Latest News

Serchhip District Chess Championship khelh tan a ni

Serchhip District Chess Association buat-saih 'Serchhip District Chess Championship-2021' chu nimin khan Serchhip Indoor Stadium-ah khelh tan niin Vawiin-ah zawhfel a ni ang.

Ni 2 awh tur Serchhip District Chess Championship hi Serchhip District Sports Committee Chairman, K. Tlangthanmawia chuan hawngin Chess game tih hmasawnna tura hruaitu tha tak tak an awm chu lawmawm a tih thu a sawi a. Infiamna lama hmasawnna atan Media mi te hman tangkai thiam a tul thu sawiin, infiamna kawng tinreng ah discipline ngai pawimawh a hun vawndik tum turin infiammi te chu a chah bawk.

Serchhip District Chess Association Vice President, David Laldintluanga kaihhruai he hunah hian SDCA Secretary, Lalrinawma chuan kum 2 chhung District Chess Championship an buatsaih theih tawhloh hnua Championship an buatsaih leh ta chu lawmawm a tih thu a sawi a, Championship pangngai buatsaih theilo mah se ni khat awh tur Tournament ang erawh an buat-saih fo thu sawiin, Serchhip District Sports Committee ten an puihbawmna ah lawmthu a sawi bawk.

He hunah hian Championship atana Arbiter, Lalremruata Ralte chuan an kalphung tur sawiin, tun Championship-ah hian Group A leh B bakah Sub-Junior ah inelna buatsaih a nih thu a sawi a, Group A-ah mi 12 leh Group B-ah mi 9, an vaiin mi 21 an tel a ni. Ani bakah hian an Pawl President, Vanlalzarliana pawhin he hunah hian thu a sawi bawk a ni.

He hunah hian kum 2021-2023 chhunga an pawl hruaitu tur thlanna neiin President-ah Vanlalzarliana, Bazar Veng; Vice President-ah David Laldintluanga, New Serchhip; Secretary-ah Lalrinawma, Vengchung; Asst. Secretary-ah Benjamin Lalrinchhana, New Serchhip, Treasurer-ah Zosangzuala, P&E Veng leh Fin. Secretary-ah VL. Chanchinthahrilmawia, New Serchhip te thlan an ni.

Comments

Chhiar Hlawhte