Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

PMMVY Award dawn lawm

Serchhip ICDS Project in Pradhan Mantri Matru Vandana Yojana (PMMVY) hnuaia ‘Best Performance Award, 2018’ leh ‘Best Implementation Award 2017-19’ a dawn lawmna chu nimin khan Serchhip Auditorium-ah neih niin District Bawrhsap, Kumar Abhishek IAS chuan a khuallian niin a hmanpui a ni.

PMMVY hnuaia Serchhip ICDS Project in lawmman an lak lawmna hunah hian District Bawrhsap, Kumar Abhishek chuan National Award dawng thei khawpa an thawhrimna leh inpeknaah Serchhip ICDS Project-a thawktute fakin a lawmpui thu a hrilh a, PMMVY Scheme tobul tlangpui sawifiahin, chhung-kaw tin tana nu te hlutzia leh chhuan lo awm zel tur hrisel zawk min hrin sak theih nana nau an pai laia an mamawh eitur tha te, hahdamna te leh thil tul dang apiang pek a tul thu a sawi a, chutianga an mamawhte an hmuh theih nan chuan he Scheme hi siam a ni a, nau an pai laia hna hahthlak thawk lova hahdam taka an awm theih nan leh an chawlh hahdam chhunga an sum lakluh tlahniam tur lo chhawk zangkhai nan he Scheme hi a tangkai hle a ni, a ti.

He hunah hian District PMMVY kalpui tawh china Anganwadi Workers thawk tha thlan-chhuah mi pathum te hnenah lawmman a hlan nghal a, TC. Lalnuntluangi, Thenzawl UPC Veng chuan lawmman pakhatna dawngin C. Lal-sangzuali, Field Veng Serchhip chuan lawmman pahnihna leh C. Laltlankimi, Thenzawl in lawmman pathumna an dawng a ni.

Serchhip ICDS Project in PMMVY National Award dawn lawmna inkhawmah hian Zoramthangi Chhangte, State Nodal Officer leh Brenda Lalrindiki, State Project Coordinator ten thu an sawi bakah F. Hmingthankimi, Serchhip District PMMVY Programme Coordinator chuan an hmalakna a tarlang a, PMMVY hi Mizo-ram-a kalpui a nih hnuah Serchhip District ah nu 2151 te tanpuina pek tawh an ni a, pawisa sem tawh zawng zawng zat hi Rs. 94,90,000 a ni.

Comments

Chhiar Hlawhte