Latest News

Kum 2020 chhungin Serchhip District-ah Malaria vanga nunna chan an awmlo

Kum kalta (2020) chhung khan Serchhip District-ah Malaria hri kai mi 18 hmuhchhuah niin Malaria vanga nunna chan an awmlo.

Serchhip CMO Office atanga thu kan dawn danin nikum (2020) chhung khan Serchhip District-ah hian mi 30,342 te thisen enfiah niin heng atang hian Malaria hri kai mi 18 hmuhchhuah an ni a, heng Malaria hrik pai zinga mi 10 te hi PF niin midang 8 te chu PV an ni thung a, heng Malaria hrik pai hmuhchhuah te hi an vaia enkawl dam vek niin Malaria vanga nunna chan an awmlo a ni. Nikum khan Serchhip District-ah Malaria hrik pai mi 23 hmuhchhuah awmin nunna chan an awmlo a ni.

Hetihlai hian Malaria laka mipuite him theih nan Health Department chuan mipuite zirtirna nasa taka a kalpui bakah District chhungah damdawi-a chiah sa Thosilen 19,259 zet semchhuah a ni bawk a, hei bakah hian damdawi hmanga Thosilen chiah hna pawh kalpui a ni bawk a, tunah hian report ala lut kim lo deuh thung a ni.

Hetihlai hian Mizoram-ah kum 2006 atanga nikum thleng khan Mizoram-ah Sikserh (Malaria) vanga thi mi 595 awm tawhin nikum bikah Malaria vanga thi mi 6 an awm a. National Vector Borne Diseases Control Programme (NVBDCP) thawktute sawi danin, nikum 2020 chhung khan Mizoram-ah thisen endik 2,77,834 atangin Sikserh vei hmuhchhuah 8,349 an awm a, chung zinga mi 6,811 te chu Malaria PF niin midang 1,538 te chu PV an thung a, Malaria hrik pai zingah hian nunna chan mi 6 an awm bawk a ni. Kum 2006 atanga nikum thlenga Sikserh hluar ber kum chu kum 2006 kha niin, hemi kum hian Malaria thihpui mi 121 an awm a, thisen endik 2,05,535-ah Sikserh vei hmuhchhuah mi 8,649 an awm bawk a ni.

NVBDCP thawktute chhinchhiah danin, Malaria vei hmuhchhuah hi kumtin mi sang tel awm reng mah se, thihpui erawh an tlem tial tial a, kum 2006-ah thihpui mi 121 an awm laiin, kum kalta 2020-ah chuan Sikserh thihpui mi paruk-ah a tlahniam tawh a. Kum kalta 2006-2020 thleng khan thisen endik 34,01,603 awm tawhin, hemi atanga Sikserh vei hmuhchhuah chu 1,59,751 niin, Malaria vei hmuhchhuah zawng zawng zinga 80% velte chu PF an ni.

Comments

Popular News (Last 30 Days)