Kawng tha kan neih theihna tura Central YMA thahemngaihna leh inpekna a lawmawm ti

MNF Adviser, Lalruatkima chuan kawng tha kan neihna tura Central YMA thahnemngaihna leh inpekna chu lawmawm an ti takzet tih a sawi.

Nimin a Aizawl Press Club-a thuthar thehdarhtute a kawmna ah MNF Adviser leh Minister, Lalruatkima chuan kum 10 chhung zet kawng chhia avanga mipui tawrhna te hriain YMA General Conference vawi 71-na, Champhai Zotlang-a neih chuan ‘Mizoram hmun hrang hranga inkalpawhna kan neih te hi tun aia tha leh changtlung zawka siam a nih theih nan Central YMA-in hma la rawh se,’ tiin a rel tih sawiin, an thurel anga Central YMA in hmalakna a kalpui mek chu MNF Party chuan tha a ti hle tih a sawi.

MNF Ministry a pian tirh phat atanga hmalakna hmasa zinga mi, kawng siamthat hna chu ngawrh taka kalpui nghal a ni tih Lalruatkima chuan sawiin, “Vawiin ah duhthusamin la zofel rihlo mah ila, hmasawnna nasa tak kan hmu mek a. Central YMA leh Mizoram PWD-te MoU an siam angin kawng siam hnathawk mek an tlawh/enfiahna ah Sawrkar hmasain hna a lo pek 16 zet mai Contractor-te thawh danah tha tawk lo leh fel tawk lo an hmuh thu Press hmaah tarlan a ni a. Central YMA-in kawngtha kan neihna tura an thahnemngaihna leh inpeknaah hian lawmawm kan ti takzet,” a ti a, thahnem ngai taka chhunzawm zel tur leh Contractor-te pawh chak zawk leh tha zawka thawk turin an beisei tlat tih a sawi bawk.

Assam Rifle sawnchhuah chungchang pawh sawiin MNF Adviser, Lalruatkima chuan “Kum 1987-a MNF Ministry Pu Laldenga (L) kaihhruai Sawrkar a lo din khan an ngaih pawimawh hmasak zingah Aizawl khawpui laili atanga Assam Rifles sawnchhuah a ni a. 14/7/1987-ah Assam Rifles-te Zokhawsang rama an insawn chhuahna tur chu pek fel a ni,” a ti a. Compensation pek tulte endik a nih hnuah Zokhawsang ram neitute hnenah Rs. 92,59,156.00 pek a ni tih sawiin, ni 31/5/1988-ah Zokhawsang ram hlanna order chu ziah a ni tih a sawi a. “Ram inhlan fel hnu hian Revenue Department-in Land Lease siam a la ngai a, AR lam pawh hian Zokhawsang chu an cheibawl nghal a ni. BRTF-in kawng laih hna an thawk nghal a, vanduaithlak takin MNF sawrkar chu 7/11/1988-ah namthluk niin President’s Rule-ah dah kan lo ni ta. Kum 1989-1998 thleng Congress Ministry-in AR sawn chhuahna tura hmalakna chhunzawm mumal a awm ta lo a ni,” tiin kum 1998-a MNF Ministry, Zoramthanga hruai a lo pian khan theihtawp chhuaha hma la chhunzawm nghalin, kum 2002 khan AR chhuahsan tur ram chu mipui leh vantlang tan emaw, Sawrkar tan a nih loh chuan mimal kuta pek phallohna dan a siam a ni tih a sawi a. MNF Ministry chu Congress-in kum 2008 atanga a rawn thlak velehin hmalakna mumal a awmloh hnuah MNF Ministry a lo pian leh khan hmalakna hmasa ah an neih leh thu a sawi bawk.