Latest News

AMC ram leina ah sum a chingpen niin MPCC in sawi

Congress Party chuan MNF kaihhruai AMC ram leinaah cheng nuai 97 a chingpen nia sawiin, MNF-te chu Zofate Jerusalem Aizawl khawpui enkawl tlak an nih loh thu leh AMC-ah pawh thlantlin nawn chi an ni tawh lo tih mipuiin an hriat a ngai tih an sawi.

Nimin-a Aizawl Press Club-a thuthar thehdarhtute an kawmna ah Mizoram Preadesh Congress Committee (MPCC) chuan MNF kaihhruai Aizawl Municipal Corporation (AMC)-in AMC Park tur leh Solid Waste Management Centre atana ram a lei danah thil fello tam tak a awm a ni tih hriatchhuah a ni tih an sawi a, Ailawng leh Sihphir Neihbawi-a ram pahnih leina ah ringawt pawisa cheng nuai 97 zet a chingpen niin an sawi.

MPCC hruaitute chuan MNF kaihhruai AMC hian kum 2018 khan Ailawng ramah AMC Park tur ram, Bigha 12 a zau n lei nia sawiin, he ram hi Rinsangpuia s/o C. Seichhunga (L) hnen atanga lei angin document-ah lang mah se, a ram neitu tak tak erawh chu Rochanmawia s/o Lalzawnga, Upper Republic a ni tih an sawi a, he ram lei nan hian cheng nuai 98 seng angin RTI leh Assembly zawhna chhannaah tarlan ni mah se, a ram neitu hian cheng nuai 40 chiah a dawng a, a bak cheng nuai 58 hi khawiah nge an thehthang tih hriat a ni lo tih an sawi a, hei mai bakah hian cheng nuai 98 zet senga ram an lei hi Asian Bulls Construction and Developers Limited (ABCD), Aizawl-ah dahkham (mortgage) lai mek a nih thu leh AMC chuan building sa zuiin, Rs. 24,60,570/- an sen thu leh ram cheithat nan Rs. 37,52,520/- zet a seng tawh thu an sawi bawk a. Hetiang a nih lai hian building sak bak chu a ram cheibawlna hmuh tur a vang hle nia sawiin, Document hrang hrang enin Ailawng-a MNF AMC ram lei hi AMC enkawltu MNF hruaitute sum siamna dik tak a ni tih a chiang hle a ni, an ti bawk.

Hei bakah hian kum 2019 khan MNF kaihhruai AMC chuan Zoramthanga huan Aii Puk bul lawk, Sihphir Neihbawi-ah Solid Waste Management Centre tur ram Bigha 12 a zau chu cheng nuai 64-in an lei bawk tih sawiin, ram an lei thu leh an leina zat hi chiang takin RTI chhanna leh Assembly zawhna chhannaah a lang tih an sawi a. Amaherawhchu, cheng nuai 64 a lei anga ziah a nih laiin a ram neitu Zahmingliana s/o Siamhrima, Sihphir Neihbawi chuan cheng nuai 25 chiah a dawng thung nia sawiin, cheng nuai 39 zet a chingpen tihna a ni tih an sawi a ni.

He ram laihzawl nan hian Rs. 22,23,400/- senral a ni tawh tih UD&PA changtu Deputy Chief Minister, Tawnluia’n Assembly zawhna chhangin a lo sawi tawh bawk nia sawiin MPCC hruaitute chuan, “A hmunhma enin a zau lo hle a, a laihzawl nana cheng nuai 22 chuang zet sen a ni pawh hi a mak hle a ni,” an ti bawk.

Comments

Chhiar Hlawhte