Chief Secretary in PMES software a tlangzarh

Online-a Project Proposal thehluhna leh vil zuina tur, Project Management & Evaluation Software (PMES) Phase-I chu nimin khan Chief Secretary, Lalnunmawia Chuaungo chuan SAD Conference Hall, Aizawl-ah a tlangzarh.

PMES Phase-I tlangzarhna hunah hian Chief Secretary chuan PMES software siamna tura hun leh tha sengtute chungah lawmthu a sawi a. Mizoram chu mahni state chhung tharchhuaha innghat thei a la nih loh avang leh hmasawnna hna kan thawh theihna tura kan innghahna pui ber chu Central Sawkar scheme hnuaia project hrang hrang kan thehluh atanga sum hailuh te a nih thin avangin he software hi felfai leh chak zawka Department ten project an thehluh theih nan a tangkai hle dawn tih a sawi a. He software thar hi tangkai taka hmang turin Department te chu chahin, a hlawhtlinna tak tak chu a hmangtute ah a innghat dawn tih a sawi bawk.

Project Management & Evaluation Software (PMES) hi Planning & Programme Implementation Department leh Information and Communication Technology Department tangkawp buatsaih a ni a, a Software hi Mizoram State E-Governance Society siam niin Ministry of DoNER, North Eastern Council, (NEC) Mizoram State flagship prog-ramme SEDP, State Sawrkar project hrang hrang Planning Department-a thehluh tur te chu PMES kaltlanga thehluh tur a ni tawh dawn a. Central Sawrkarin tih leh tihloh tur a bituk te zawm kim loa, format diklo-a project thehluh tam tak a awm thin avangin chumi tih bona tur leh rang zawka hna thawh a nih theih nan he software hi duan a ni. Nimin a Chief Secretary in a hawn tak PMES software hi a thawhkhatna niin Project Proposal submit-na tura duan a ni a. Planning Department in verification leh monitoring an tih zuina tur, PMES Phase-II hi hun remchangah hawn a ni leh ang.