Chanchin thar thenkhat :

Inthlan puan hnaih rin a ni

Election Commission of India chuan Ser-chhip Assembly Constituency-a bye-election neih hun tur a puang hnai nia thudawn a ni. Election Directorate thawktute sawi danin Election Commission of India (ECI) atangin Serchhip bial MLA inthlan hun tur tak chu la hriattir lo mah se an puan hnaih an ring tih an sawi a. Election Commission of India thupek angin EVM enfiah hna pawh an thawk zo tawh nia sawiin, tunkar chho-ah chuan an puan mai an rin thu an sawi bawk. Thudawn danin Assam leh West Bengal Assembly inthlan hi April thla vel hian Election Commission of India chuan a buatsaih a rinawm a, hemi rual hian Serchhip MLA bial ruakah hian bye-election nei tura ruahmanna ECI in a siam a rinawm a ni.

Mipuiin hnathawh tur thlang

Tualchhung hmasawnna hnathawh tur rua-hmannaa mipuite tel ve theihna tur, Participatory Budgeting Initiative chu Mizoram-a a hmasa ber tura Lunglei District-a kalpui mekah a pahnihna ni turin Inrinni khan Lunglei Pukpui VC-ah mipui ten hnathawh tura an duh thlangin Vote an thlak a, hemi hmalam hian Lunglei Salem Veng-ah an lo kalpui tawh a ni. Lunglei Pukpui-ah hian mipuiten lehkha leh Social Media hmanga hma-sawnna hnathawh tur an ngaih pawimawh hrang hrang an thawhkhawm chu khawtlanga Steering Committee ten pasarih-ah thlifim lehin, heng atang hian mipuiten ruahmanna an duh zawng pathum vote hmangin an thlang chhuak leh a ni. 

Bill ngaihtuah tur 2 lut tawh

Mizoram Legislative Assembly Budget Session chu naktuk atang hian neih tan a ni dawn a, tun tum Session-a ngaihtuah tur hian Bill pahnih a lut tawh a, Zirtawpni tlai thleng khan House chhunga chhan chi zawhna (Starred Question) 379, ziaka chhan chi zawhna (Unstarred Question) 189, Resolution 78 leh Paper Lay tur 11 a lut tawh bawk. Thutkhawm tan ni hian House-ah Larsap in thu a sawi dawn a ni.

Myanmar-a Zofate chah

Mizo Students’ Union (MSU) General Hqrs. chuan Myanmar ram-a tualchhung buaina thleng mekah kan unau, Zofate chu an Jerusalem, Mizo-ram lam rawn hawi hrehlo tura chahin, mamawh an neih apiangah chhawmdawl an inhuam thu an sawi a. Mizoram-a rawn raltlante chu a tha thei ang bera lo chhawmdawl tur leh tanpui an ngaihna ah rang taka tanpui turin sawrkar an ngen bawk.

Pisa kai hun bithliah thar

Mizoram sawrkar in a hnuaia hnathawktu te tana Pisa kai hun a bituk thin angin Pisa kai hun bi thar chu Vawiin atang hian hman a ni dawn a, Pisa kai hun hi Mizoram leh hmarchhak State-a Mizoram House-ah zing dar 9:00 atanga tlai dar 5:00 a ni a. Ramchhung hmun danga Mizoram House-ah zing dar 9:30 atanga tlai dar 5:30 chhung a ni thung ang.