Latest News

Chanchin thar thenkhat :

 Sawrkar in chhunfin leh ta

Mizoram sawrkar-a Ariculture Department hnuaia peng pahnih awm te chu pakhat-ah dah niin Director thar ruat a ni bawk. Mizoram sawrkar chuan Nov. 1, 2002 atang khan Agriculture Department chu Director pahnih - Crop Husbandry leh Agriculture Research and Extention hnuaia dah a ni a, amaherawh chu kum 18 hnu, nikum Nov. 1 khan Cabinet chuan Department pakhata chhungkhawm leh tura relin, Agriculture Department tih a ni a, Agricultural (Research & Extention)-a Director nilai, Dr. H. Saithan-tluanga M.Sc (Agri) chu Mizoram Public Service Commission (MPSC) rawtna angin Agriculture Director ni turin a ruat a, hemi atan ruatna hi DP&AR chuan January 28, 2021 khan hriattirna a tichhuak tawh a ni. Dr. H. Saithantluanga hi Mizoram Agriculture Service (MAS) Supertime Grade Level 13A ah kaisantir niin hnuaiah hian Additional Director 2, Joint Director 6, Deputy Director 34, Assistant Director 77, Principal Integrated Training Centre, Hnahthial te an awm a ni.


Hmalak dan tur sawiho

Nimin khan Lawngtlai-ah District Wildlife Crime Control Sub-Unit chu thukhawmin tlawm-ngai pawl hrang hrangte nen Sava veh leh Sapel/ramsa-a sumdawnna titawp tura hmalak dan tur an rel a. He hunah hian Lawngtlai District chu ramdang nena inri (international border-a awm) a nih avangin ramsa leh a kaihnawih thil, dan phalloh chite inhlanchhawnna kal khan a ni thei tih tarlan niin, kum 2020 kum kal mekah an District-ah Wildlife kaihhnawiha dan bawhchhiatna thil tum 7 manchhuah tawh niin Court-ah thubuai kallai pahnih a awm thu tarlan a ni bawk.


ZMC-ah zirna tan leh ta

Hripui leng avanga Zoram Medical College-a Doctor zirlai ten hun engemaw chen zirna an chhunzawm theihloh hnuah nimin khan MBBS 3rd Batch te chuan zirna an tan leh ta a, 1st Batch leh 2nd Batch te pawhin nimin atang khan Class kaldan pangngaiin an kalpui tan bawk.


Avian Influenza sawihona nei

Nimin khan Mamit-ah District Level Co-ordination Committee on National Animal Disease Control Programme (NADCP) chu an District Bawrhsap hovin an thukhawm. He hunah hian Avian Influenza chungchanga hriat tur pawimawh tarlan niin, Avian Influenza chu Ar leh Sava natna a nih thu leh, ran chi hrang hrangin an kai thei tih tarlan a ni a. He natna thlentu virus chi khat H5N1 hi mihringin Ar atanga a kai chuan natna a thlen theih thu leh hri kai 60% laiin a thihpui theih avangin fimkhur taka hmachhawn a tul thu tarlan a ni bawk. He thutkhawm ah hian hrileng chungchang mipui nawlpuite hriat tura Awareness Campaign neih dan tur pawh sawiho a ni bawk.


Zu leh ruihhlo man hnem

Thla kalta, January 2021 chhung khan Excise & Narcotics Department chuan ruihhlo leh a kaihhnawih chi hrang hrang thahnem tak an man a, hemi hun chhung hian Rakzu litre 4,394.680 manin Zu bilhlai Tin 8,532 an man a, Zu chhuanna Bel 203, Dawidim kg 17, Sapzu um puitling (750 ml) bottle 2738, Sapzu a chanve um (375 ml) bottle 50, Beer (500 ml) Can 1222, Beer (300 ml) Can 24, BEDC litre 187.600, Heroin kg 2.057, Ganja kg 6.880, Cough Syrup 47, Alprazolam Tablet 780, Meth-amphetamine kg 6.931, lirthei 6 an man a, heng kaihhnawih ah hian Dan bawhchhia 248 man an ni bawk.

Comments

Popular News (Last 30 Days)