Fimkhurna thlahthlam loh a tul

Fimkhurna thlahthlam loh a tul

Kum khat dawn hri leng avanga kan nunphung pangngai kan zawh theihloh hnu ah sawrkar in hri leng avanga inkhuahkhirhna thlahdul hret hretin tunah chuan sawrkar Pisa tam ber te pawh Dan pangngaia a kal hnuah zirna In te pawh hawn tan leh mek a ni a, hei mai bakah hian Thla 10 chuang Pathian biak inkhawm kan neih mumal theihloh te pawh tun thla atang hi chuan kaihhruaina hnuaiah Inkhawm te kan nei leh thei dawn ta niin a lang a, hetianga hri leng kara nunphung pang-ngai kan zawh chho leh tan thei mek hi a lawmawm hle a ni.

Kan hriat angin Mizoram in hri leng kan buaipui atang khan kan sawrkar leh kan tlawmngai pawl bakah Kohhran leh mimal ten hri laka him turin theihtawp kan chhuah a, inkaihhruaina pawh ramchhung hmundang aia khauh zawka siam niin hei hi mi tam tak te chuan an sawisel thin bawk a. Amaherawh chu hetianga khuahkhirhna khauh tak siam a nih avang leh mipuite pawhin kan zawm that avangin tunah chuan India ram State hrang hrang zingah hri leng avanga nunna chan tlemna leh hri kai tlemna ber pawl kan ni ta a, hei hi kan vaia thawhrah tih loh theih a ni awm love.

Tunah chuan hri laka kan State hi la fihlim lo mah ila hri kai pawh tlemte chauh kan ni tawh a, hri kai hmuhchhuah thar awm loh ni te pawh kan nei ta fo mai. Heng te hi hun rei tak kan lo inkhuahkhirh tawhna leh thu kan awihna Pathian in mal a sawm vang tih loh theih a ni lo. Chuvangin, hri leng laka inkhuahkhirhna thlah zalen a nih avang hian kan fimkhurna te thlahthlam chuang lo ila, finkhur taka kan khawsak chuan kan him zel thei zawk a ni tih i hre reng ang u.