Latest News

Chanchin thar thenkhat :

Mi 9,346 vaccine pe tawh

January 16 atanga Mizoram-a COVID-19 Vaccine pek hna kalpui mekah Inrinni thleng khan mi 9,346 hnenah hri danna hi pek a ni tawh a. COVID-19 hri danna pek chungchanga sawrkar thupuangtu Dr. Lalzawmi sawi danin thla chanve chhunga hri danna pek chungchangah hian ram pum huapa a titha 10 zingah Mizoram a tel pha a, tunah hian hriselna lama thawktute pek hmasak phawt an ni. Hri danna Covishield dose 18,500 chu January ni 14 khan Pune atangin Lengpui Airport-ah rawn phurh thlen a ni a, a hnu-ah dose 16,500 phurh thlen leh a ni a. Tunah hian Serum Institute of India siam chhuah Covishield dose 35,000 a rawn thleng tawhin pek chhun-zawm zel tur a ni ang.


H&TE Minister in hawng

Higher & Technical Education Minister Dr. R. Lalthangliana chuan Inrinni khan Govt. Hnah-thial College tlawhin Govt. Hnahthial College-a RUSA hnuaia building sak pathum leh Hnahthial District Skill Development Programme a hawng a. He hunah hian Dr. R. Lalthangliana chuan RUSA kaltlanga Govt. Hnahthial College in building thar tha tak tak an nei chu a lawmpui thu a sawi a, Mizoram thalai lehkhathiam, ram leh hnam tana chhenfakawm tak tak chherchhuahna hmanraw tangkai tak ni ngei se a duh thu leh chutiang taka a tangkaina phawkchhuak thei tura an theihna zawng zawng hmang turin Govt. Hnahthial College-a zirtirtute a chah bawk a ni.


Kawnpui-ah SBI hawng

Supply Minister, K.Lalrinliana chuan Inrinni khan Mizoram chhunga Aizawl Regional Branch 45-na ni turin SBI Kawnpui Branch a hawng a, Minister chuan SBI, Kawnpui Branch chu sumdawn nan ringawt ni lovin mi te ber atanga mi lian ber thleng a hmasawnna kawng a indawr-tawnna hmun nuam tak a nih ngei a beisei thu a sawi bawk. Minister hian Kawnpui-a PHE SDO Office sakna tur leh PHC te pawh tlawhin PHC a an mamawh te an lo thlen nghal bawk.


MNF Manifesto tlangzarh

MNF President leh Chief Minister, Zoram-thanga chuan Inrinni khan Aizawl-a Mizo Hnam Run-ah AMC inthlanna neih tura MNF Manifesto chu tlangzarhin MNF Website a tlangzarh a, he hunah hian MNF President, Zoramthanga chuan AMC inthlan chu a naran lo tih sawiin, Mizo-ram mipui hmun thuma thena hmun khat awmna leh mithiam zawk awmkhawmna a nih avangin election lo awm tur hi a pawimawh em em tih a sawi a. AMC chu a tirah Municipal Council tiin MNF-in bul an tan tih sawiin, “Keini hi a neitu kan ni a, midangte chu vai party lo pem lut an ni. Keini chuan a takin hna kan thawk ang. Sawrkarna siam ngei pawh kan inring,”a ti bawk.


Ailawng Zokhua kangral

Mizoram sawrkar-a Information & Public Relations Department leh Mizoram Film Forum tangkawp ten Ailawng Film City-a Zo khua hmun-a Di In an sak zawng zawng chu nimin khan a kangral vel. Thudawn danin Ailawng Zokhua-ah hian Mizo In hrang hrang 16 sak a ni a, nimin chhun dar 12:00 vel khan Lal In tura an sak atanga kangmei hi a intan nia hriat a ni a, In hi inhnaih te te-a sak a nih avangin a in mankai rang hle nia thudawn a ni. Ailawng-a Zokhua hi kum 2019 atanga sak niin hri leng avanga tlawhpawh theihloh a khar a nih chhung pawhin Gate te tichhia-a kal an awm fo nia sawi a ni bawk.

Comments

Popular News (Last 30 Days)