Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

ZPM Thupui leh Innghahna chu - Kalphung Thar Mipui Sawrkar tundin a ni - K. Sapdanga

ZPM Party chuan Aizawl Municipal Corporation (AMC) inthlan lo awm tura ZPM Party Candidate-te Official-a puanna nimin khan an buatsaih a, he hunah hian ZPM Vice President, K. Sapdanga chuan, “ZPM Thupui leh Innghahna chu - Kalphung Thar Mipui Sawrkar tundin a ni,” a ti.

Aizawl-a ZPM Office-a AMC Candidate puanna hunah hian ZPM Vice President chuan AMC term thumna-ah hian ZPM chuan sawrkar siam ngei an tum thu leh AMC thar din an tum thu a sawi a, “Pathian leh mipuite zara kan sawrkar chuan AMC Dan-in a duh ang thlapin Ward Committee din a ni ang a, thuneihna pek a ni ang a, mipuiten AMC-ah Chhiah (Property Tax etc.) thahnem tak kan pe a, heng Chhiahte hi pek a nih chhan ang takin a petu mipuite hnenah pek kir leh a ni ang,” a ti a. Sum vêk-a pekkir leh chu Dan-in a phallo tih sawiin, “Hmasawnna leh mipui tana tangkai hmasawnna thilhlu-in pekkir a ni ang a, pekkir dan kimchang puanzar a ni ang. Municipal chhunga chhungkaw tinte khawsak dan him leh nghet tura chawikan vek tum a ni a, thalaite tan an phu tawk eizawnna remchang a tam thei ang siam tum a ni ang,” a ti bawk.

ZPM Vice President chuan ZPM sawrkar chuan ram rorelnaah Hmasawnna Ruai a siam ang tih pawh sawiin, “Fatu Hlui siam a ni lo anga, ruai siam chhan mipuiten ruai an kil hmasa anga, mipui puar hnuah fatu ten an kil ve chauh ang. He kalphung hi ZPM chuan eptu kan nihlai atangin kan MLA-te hmangin kan enchhin tawh a, kan hlawhtling hle a ni,” a ti a. ZPM thupui chu ngaihtuahna thara kal tur sawrkar din a ni tih pawh sawiin, “Pawl inrelbawl danah te, inthlan huna vote zawn danah te kut tling taka kal a tum a. Sawrkar siam hrim hrim duh vanga hmanraw bawlhhlawh hman a tum lo,” a ti a. 'Inti sakhua, inti Kohhran' tia puh an nih thu pawh sawiin, “A hranpain kan inti sakhua lo a, kan inti Kohhran hek lo; Kristian ramah hian Kohhran rilrem zawng tak sawrkar tha leh chak a siam theih ang tih kan ring a, kan tum bawk a, chu chu kan aupui mai zawk a ni,” a ti bawk.

AMC inthlanna lo awm turah hian ZPM Party chuan Ward 19 awm te chu Party mal in an chuh vek dawn a, he inthlanna neih turah hian Symbol atan ‘Tlang kara Ni chhuak’ chu an hmang dawn tih an sawi bawk.

Comments

Chhiar Hlawhte