Latest News

ACB-a Investigating Officer intuaihriamna nei tan

Anti Corruption Bureau (ACB) a thawk Investigating Officer te tana kar khat chhung awh tur intuaihriamna hun, Refresher Course chu nimin khan neih tan niin Chief Secretary, Lalnunmawia Chuaungo chuan a hawng a ni.

ACB Office Conference Hall, Aizawl-a he training hawnna ah hian Chief Vigilance Officer ni bawk, Lalnunmawia Chuaungo chuan hlemhletna (Corruption) chu thil thar a nih loh thu te, mihring ten tunhma atanga kan chenpui reng a nih thu te, mahse chuti chungin engti zawng maha sawimawi emaw, sawi nep chi emaw a nih loh thu te a sawi, a hluar zel loh nan, hmalak erawh kan tih makmawh theuh a ni, a ti. Ram rethei leh mipuite rahbehna a nasatna ramah zel hlemhletna a hluar emaw tiin a sawi theih thin tih pawh sawiin Chief Secretary chuan, chutiang ramah chuan hmasawnna a thuanawp a, mipuite chan tur mi tlemte in an insem a. Dan felfai neih loh te, kalphung leh system neih thatloh avangte in hlemhletna hi a tipung thei niin a sawi bawk.

Chief Secretary chuan ACB chu mipui thatna leh an hlawkna, Public Welfare leh Public Interest atan thawk nia a hriat thu sawiin, pawimawhna lian tak a neih thu a sawi a. Mizoram-in Lokayukta kan neih chinah ACB nen hnai takin an thawkho a, Lokayukta hnenah ACB in case engemaw zat a transfer tawh a, hun lo kal zelah pawh an inlaichinna leh an thawhhona hi a phuisui zel an beisei thu a sawi a. Khawvel danglam mekah sualna pawh a danglam chho ve zel a, sum lamah inbumna te, IT hmansualna te a hluar cho mek a, hengte pawh hi Investigating Officer an nih angin an hriat zel leh anmahni pawh hetiang lamah an in intuaihriam a pawimawh thu a sawi bawk.

Comments

Chhiar Hlawhte