Latest News

Serchhip District-a sample enfiah 5817 atangin COVID-19 hri kai 179 hmuhchhuah an ni tawh

Serchhip District chhungah COVID-19 hri leng avangin nimin thleng khan sample 5817 enfiah ni tawhin hri kai 179 hmuhchhuah an ni tawh a, Serchhip District-a hri kai enkawl zingah mi 381 te enkawl dam an ni tawh thung.

Serchhip CMO Office atanga thu kan dawn danin COVID-19 hri leng avang hian Serchhip District-ah Sample enfiah hna ngawrh taka kalpui chhunzawm zel a ni a, nimin (Jan. 11, 2021) thleng khan Zoram Medical College (ZMC)-a RT-PCR Laboratory-ah Serchhip District atanga thawn sample 1137 enfiah ni tawhin Serchhip District-a TrueNat Laboratory-ah sample 2284 enfiah a ni tawh a, hei bakah hian Rapid Antigen Test (RAgT) hmangin sample 2396 enfiah a ni tawh bawk a, Serchhip District atanga sample lak enfiah tawh zawng zawng hi 5817 a tling tawh a ni. Serchhip District chhung atanga sample lak enfiah atang hian COVID-19 hri kai mi 179 hmuhchhuah an ni tawh a, heng zinga 177 te chu enkawl dam ni tawhin tunah hian hri kai enkawllai pakhat awmin hri kai zingah nunna chan mi pakhat a awm tawh bawk a, tuna hri kai enkawllai la awm hi Vawiin-ah a sample enfiah sak lehin hri laka a fihlim chuan chhuahtir theih a ni dawn a ni.

Serchhip District atanga hri kai hmuhchhuah mi 177 te enkawl dam an nih tawh lai hian Serchhip District atanga hri kai enkawl dam zawng zawng erawh 381 an tling tawh thung a, Serchhip District-a hri kai enkawl dam mi 177 bakah hian District danga BSF sipai hri kai hmuhchhuah mi 149, Nursing School CCC-a rawn dah leh District dang atanga hri kai enkawl tur Thenzawl AYUSH Hospital CCC-a dah mi 55 enkawl dam an ni tawh bawk a, District dang atanga hri kai enkawl tur rawn dah te hi enkawl dam vek an ni. Hetihlai hian Serchhip District atanga hri kai hmuhchhuah te zingah mi pahnih te chu hmundanga enkawl tura refer an ni tawh thung a, heng mite hi ZMC-ah ve ve refer niin tunah chuan enkawl dam an ni tawh a ni.

Tun dinhmunah Serchhip District-ah hri leng avanga mahni In lama inkhunghrang mi 29 an la awm mek a, sawrkar hmunhmaa inkhunghrang mi 26 la awm bawkin Serchhip District-a inkhunghrang hi mi 55 an la awm mek a ni.

Comments

Chhiar Hlawhte