Latest News

Serchhip-ah National Voters’ Day 2021 hmangin E-EPIC chungchang inhrilhfiahna neih a ni

National Voters’ Day vawi 11-na chu nimin khan rampumah hman niin Serchhip-ah pawh he Ni pual hian District Election Officer, Kumar Abhishek IAS hovin hun hman a ni a, E-EPIC hman tur chungchang inhrilhfiahna hun hman a ni bawk.

Serchhip DC’s Conference Hall-a National Voters’ Day puala inkhawm ah hian District Bawrhsap, Kumar Abhishek chuan National Voters’ Day chu January 25, 2011 atangin India rampumah hman thin a nih thu leh he ni hi Election Commission of India (ECI) din champha a nih thu a sawi a. National Voters’ Day chu India khua leh tui, kum 18 tling chinte tan Electoral Roll-a inziahluh a pawimawh zia inzirtirna atan te, Vote nei thei ten kan aiawh thlang tura inthlanna-a Vote thlak a pawimawh zia inzirtirna atan te hman thin a nih thu a sawi. Election Commission of India chuan India rama kan aiawha roreltu tur MP Lok Sabha, MP Rajya Sabha leh State Assembly Member thlanna te a buatsaih thin thu sawiin, tunhnaiah pawh State thenkhat inthlanna chu hri leng karah hlawhtling taka buatsaih a nih thu a sawi a. Hetianga mipui ten kan aiawha roreltu tur kan thlan theihna tura thawktute zawng zawng chungah lawmthu a sawi bawk a ni.

Serchhip-a National Voters' Day puala inkhawm hi Serchhip Addl. DC, Lalmuansanga Ralte chuan kaihruaiin Serchhip Election Officer, Vanlalhmachhuana MCS chuan E-EPIC chungchang a sawifiah a. E-EPIC hi nimin-a Voters’ Day hmanna ah tlangzarh tur a nih thu leh E-EPIC ah chuan Electors ten EPIC Card kan hman thin chu pdf Format (digital format)-a kalpui a nih tawh dawn thu a sawi a, kb250 vel chauha lian E-EPIC hi EPIC tihchhiat leh tihbo palh ah pawh tangkai tak a nih tur thu sawiin, Phone-ah pawh hei hi awlsam taka dah theih leh hman theih a nih dawn avanga tangkai hle tur a nih thu a sawi a, hmasa ber atan tun thla chhungin Electoral Roll Revision hnuhnung bera Vote nei thar te tan download theih a nih dawn thu leh hemi hnu hian Vote nei zawng zawngte tan download theih tura ruahman a nih thu a sawi bawk.

Nimin-a he hun hmanna a tel te hian F. Lalnisai, SDC kaihhruaina hnuaiah Voters' Pledge an chhamrual a, kumin-a Electoral Roll-a thun thar mi 10 te hnenah EPIC semchhuah nghal a ni bawk a, ECI in he Ni puala Message a siam chu a lem nen thlirho a ni bawk.

National Voters’ Day hi Serchhip District chhunga Civil Sub-Division thuthmun ah te pawh hman a ni bawk a, hei bakah hian District chhunga BLO hrang hrangte pawhin anmahni bial theuh ah kumin a Vote nei thar te EPIC an sem bawk a ni.

Comments

Chhiar Hlawhte