Mi 72 te hri danna pe leh

Nimin khan Serchhip District-ah mi 72 te COVID-19 Vaccine pek leh niin heti hian tun thlengin Serchhip District-ah Health Care Workers mi 378 te hri danna pek an ni tawh.

Serchhip District-ah COVID-19 Vaccine, Covishield pek hna kalpui mekah hian nimin khan Serchhip Town chhunga Vaccination Side pahnih te titawpin Mercy Hospital-ah Health Care Workers te hi hri danna pek leh an ni a, nizan dar 6:00 thleng khan mi 30 te hri danna pek an ni a, Thenzawl CHC-ah mi 42 te hri danna pek leh an ni bawk a ni.

Heti hian nimin thleng khan Serchhip District-a Health Care Workers mi 450 te hri danna pek tura ruahman ah mi 378 te chu hri danna hi pek an ni tawh a, Serchhip Town chhunga mi 272 te hri danna pek ni tawhin Thenzawl CHC-ah mi 106 te hri danna hi pek an ni tawh a ni. Serchhip District chhunga COVID-19 hri danna pek mek hi Vawiin-ah chawlh tura ruahman niin naktuk khian chhunzawm leh a ni ang.