Rethei-a tumah an awm loh nan ram leilung hausakna haichhuah tum a ni - Chief Minister

Chief Minister, Zoramthanga chuan nimin khan Khawzawl District-a sawrkar Office hmunpui tur, Deputy Commissioner's Office Complex sakna tur lungphum a phum a, State pum hmasawn theihna tura chhung tinin thawhchhuah tha tak an neih leh rethei-a tumah an awm loh nan ram leilung hausakna haichhuah tum a nih thu a sawi.

Khawzawl Zaingen YMA Hall-a Deputy Commissioner's Office Complex sakna tur lungphum phumna hunah hian Chief Minister, Zoramthanga chuan DC Office Complex lungphum phum chu District Headquarters tur, sawrkar Department hrang hrangin Headquarters-a an neiha an awmkhawm theihna tur a nih thu leh sawrkar Office hrang hrang dawr tur ten hmun leh hmuna awlsam taka an dawr theihna tura ruahman a nih thu a sawi a. COVID-19 hrileng avangin sawrkarin pawisa nei tam thei rihlo mahse District Headquarters sak chu ngaih pawimawh a nih avangin cheng nuai 1000 sanction sa a nih thu a sawi a, boruak tha a inher chhuah beisei chungin chak taka hna bawhzui tum a nih thu a sawi bawk.

Chief Minister chuan State pum hmasawn theihna tura chhung tinin thawhchhuah tha tak an neih leh rethei-a tumah an awm loh nan ram leilung hausakna haichhuah tum a nih thu pawh he hunah hian a sawi a, COVID-19 hrileng avangin chak taka hmalak theih rih loh mahse tunah vaccine pek bul tan turin ram a inpuahchah tawh a, beiseina eng nen hma chak taka lak thuai theih beisei a ni, a ti a. COVID-19 hrileng hrek behna atangin remhriatna thar tha zawk pawh a pian belh zel thu te a sawi. Chief Minister chuan tum chiang tak neia, theihna leh thiamna zawng zawng sawmkhawma hna kan thawh tlan chuan malsawmna kan haichhuak ngei ang, tiin mipuite thawhpuiah a sawm nghal bawk a ni.

He hunah hian khual zahawm, bialtu MLA leh Deputy Chief Minister, Tawnluia chuan Khawzawl District tihchangtlunna tura sawrkar hmalakna ah District mipui an lawm hle tih sawiin, Khawzawl District tihpuitlinna hna kal mek zelah Department hrang hrang- UD&PA, Revenue, Education leh a dang ten District Office an hawn bakah Divisional leh Sub-Divisional Office te pawh District Office ah hlangkaiin, Department dang pawhin District Office hawng tura hma an lak zel thu a sawi a. District a phuisui sawtin, kawng hrang hranga hmasawnna ruhrel siam a nih zel dan tarlangin, Aerosports neihna tur hmun te thlithlai a nih thu a sawi bawk.

Nimin-a he hun hmanna ah hian Sports Minister, Robert Romawia Royte pawhin District thar pathum te cheibawl tura hmalakna hrang hrang zingah Community Information Centre (CIC) din a nih theih nan sawrkar laipuiin a thuphunga phalna a pek tawh thu a sawi a; District thar pathum te tan Department hrang hrangin theihtawp an chhuah thu a sawi bawk.

He hun hmanpuitu Horticulture Development Board Vice Chairman Prof. F. Lalnunmawia MLA pawhin Khawzawl District leh District thar dang pahnih te an lo changtlun deuh deuh theihna tura sawrkarin theihtawp a chhuah thu sawiin, State pum tan pawh hmasawnna a thlen ngei a beisei thu a sawi bawk.

Horticulture Department enkawltu Addl. Chief Secretary, JC. Ramthanga chuan nimin a lungphum phum tak DC Office Complex sakna tur pawisa, Contractor leh mamawh dang te chu peihfel a ni tawh tih sawiin, hma lak nghal theih mai a nih thu a sawi a. Addl. Chief Secretary chuan Khawzawl-a District Horticulture Office hawn chungchangah Divisional Office thin kha District Office-ah a hming thlak satliah mai lovin tihlen a nih thu a sawi a, kuthna-thawktute tan pawh a tangkai lehzual tur thu a sawi bawk.

Nimin-a he hun hmanna ah hian Khaw-zawl District-a Officer pawimawhte, khawtlang leh tlawmngai pawl hruaitute an tel a ni.