Latest News

Population Based Screening chungchang zirhona nei

Serchhip District chhunga Health & Wellness Officer (HWO), Health Worker leh ASHA te tana National Programme for Prevention and Control of Cancer, Diabetes, Cardiovascular Diseases and Stroke hnuaia hmalakna peng pakhat, Population Based Screening chungchang zirhona ni 2 chhung awh chu nimin khan zawhfel a ni.

He zirhona Lalpuithanga Hall-a neih hi Serchhip CMO, Dr. Laldawngliana Sailo chuan hmanpuiin he hmalakna hi khawtlang hriselna atan a thil pawimawh tak anih thu sawiin, he huna tel te chu an thil zir te tangkai taka hman tum turin a chah a ni.

He hun kaihruaitu NPCDCS-a District Programme Coordinator, K. Zothanpuii chuan NPCDCS leh Population Based Screening chungchang sawifiahna neiin NPCDCS chuan inkaichhawn theihloh natna (Non-Comunicable Diseases)- BP Sang, Zunthlum, Ka chhung na, Hnute leh Chhul Cancer, Lungna leh Stroke lakah invenna lam a kawk bik tih sawiin, heng natna inkaichhawn theihloh te laka khawtlang an himna turin heng natna vei awlsam bik nia ngaih, kum 30 tling chin chunglam te chu In tinah kal-a an hriselna endiksak vek chu Population Based Screening in a tum anih thu a sawi.

Hei bakah hian Serchhip District Hospital-ah NCD Clinic a awm thu pawh tarlangin, thawktu Staff Nurse pahnih, Physio pakhat leh Counsellor pakhat ten a thutchilh reng tih sawi a, BP Sang leh Zunthlum enfiah tir duhte tan a thlawn a an edik sak thin thu a tarlang bawk.

He zirhona hunah hian Juby Zosangliani, Staff Nurse NPCDCS chuan kalkhawmte hi thupui thlanbik hmangin zirtirna a pe a, Serchhip District chhunga Health & Wellnes Officer, Health Worker leh ASHA te telin he Training-a tel turte hi tumkhat-ah kohkhawm vek theih an nih loh avangin nimin leh niminpiah khan neih a ni.

Comments

Chhiar Hlawhte