Mizoram-ah hri kai thar 17; nunna chan thar pakhat

Inrinni-a Mizoram-a Sample enfiah te atangin COVID-19 hri kai 17 hmuh belh leh an ni a, nimin khan hri kai zingah nunna chan pakhat an awm belh leh bawk.

Inrinni khan ZMC Laboratory-ah Sample 255 enfiah niin heng atang hian COVID-19 hri kai mi 11 hmuhchhuah leh an ni a, heng hri kai hmuhchhuah zing mi 4 te chu State pawn atanga rawn lut an ni a, Aizawl Maubawk Veng-ah hri kai mi 5 hmuh niin tualchhung a hri inkaichhawng, In lama inkhunghrang mek an ni a, Chhinga Veng leh Falkawn-ah tualchhung-a hri inkaichhawng pakhat ve ve hmuh an ni.

Inrinni khan District hrang hranga TrueNat Laboratory-ah Sample 99 enfiah ni bawkin hri kai mi pathum hmuh an ni a, Lunglei District-ah BSF mi pahnih leh Lawngtlai District-ah JNV-a Zirtirtu mi pakhat niin an vai hian State pawn atanga rawn lut vek an ni. Rapid Antigen Test hmanga Sample 435 enfiah te atangin hri kai mi pathum bawk hmuh niin Lawngtlai District mi vek an ni a, an vai hian tualchhung a hri inkaichhawng vek an ni bawk.

Hetihlai hian December 21, 2020-a hri kai hmuhchhuah leh ZMC ICU-a enkawl, Lakhi Dhan Chakma (57), Silsury (Mamit District) chu nimin chawhnu dar 2:30 khan a boral ve leh a, amah hi BP sang nei niin Aizawl lama damdawi In-a a awm laia hri kai hmuhchhuah a nih avangin Aizawl District-a hri kai nunna chan anga chhiar a ni thung.

Heti hian nimin thleng khan Mizoram-ah Sample 1,86,887 enfiah ni tawhin heng atang hian COVID-19 hri kai 4292 hmuh an ni tawh a, Sample enfiah atanga za zela 2.30 te chuan hri kaiin nimin khan hri kai mi 6 te chu enkawl dam leh an ni thung a, heng te nen hian nimin tlai dar 5:00 thleng khan Mizoram-ah hri kai 4192 te enkawl dam ni tawhin hri kai enkawllai 91 an la awm mek a, hri kai zingah nunna chan mi 9 awm tawhin hri kai zinga za zela 97.67 te chu enkawl dam an ni tawh a ni.