Mizoram-ah COVID-19 hri kai mi 4 hmuh belh leh

Niminpiah-a Mizoram-a Sample enfiah atangin COVID-19 hri kai mi 4 hmuh belh leh an ni a, Mizoram-a hri kai hmuhchhuah zawng zawng chu 4303 an tling ta.

Niminpiah khan ZMC Laboratory-ah Sample 344 enfiah niin heng atang hian hri kai hmuhchhuah an awm lova, District hrang hranga TrueNat Laboratory-ah Sample 100 enfiah niin hri kai mi 3 hmuh an ni a, Lunglei, Kolasib leh Khawzawl District-a hri kai hmuh te niin an vai hian tunhnaia State pawn atanga rawn lut vek an ni. Niminpiah-a Rapid Antigen Test (RAgT) hmanga Sample 634 enfiah atangin hri kai mi pakhat hmuh a ni bawk a, he hri kai hi Lunglei District chhung Puankhai khaw mi niin a chetsualna avanga Tlabung damdawi In panpui a nih hnuah Lunglei damdawi In panpui leh a ni a, Aizawl-ah refer niin hetah hian hri a kai tih hmuhchhuah a ni ta a ni.

Nimin khan tlai dar 5:00 thlengin Mizoram-ah hri kai enkawl dam an awm belh lova, heti hian nimin tlai dar 5:00 thleng khan Mizoram-ah sample 1,89,178 enfiah tawh atangin COVID-19 hri kai 4303 hmuhchhuah an ni tawh a, heng zinga 4200 te chu enkawl dam ni tawhin hri kai hmuhchhuah atanga zaa 97.60 te chu enkawl dam an ni tawh a, tunah hian hri kai enkawllai mi 94 awmin hri kai zingah nunna chan mi 9 an awm tawh bawk a ni.