Mizoram-ah COVID-19 hri kai mi 3 hmuh belh leh

Niminpiah-a Mizoram-a Sample enfiah 1325 atangin COVID-19 hri kai mi pathum hmuh leh an ni.

Niminpiah khan ZMC Laboratory-ah Sample 87 enfiah niin heng atang hian COVID-19 hri kai pakhat hmuh leh a ni a, hri kai hmuhchhuah hi Aizawl District mi niin tunhnaia State pawn atanga rawn haw a ni. Niminpiah khan Rapid Antigen Test hmangin Mizoram-ah Sample 1033 enfiah niin hri kai mi pahnih hmuh an ni a, Aizawl District-a hri kai hmuh ve ve niin School luh dawn avanga Sample enfiahna a hri kai hmuh te an ni a, hri an kaina chhui mek a ni bawk. District hrang hranga TrueNat Laboratory-ah niminpiah khan Sample 205 enfiah niin hri kai hmuh erawh an awmlo thung a ni.

Nimin thleng khan Mizoram-a Sample enfiah 1,99,000 te atangin COVID-19 hri kai hmuhchhuah chu 4349 an tling ta a, hei hi Sample enfiah atanga zaa 2.18 a ni a, nimin khan Mizoram-ah hri kai 6 te chu enkawl dam leh niin heti hian nimin tlai dar 5:00 thleng khan Mizoram-ah hri kai  4282 te chu enkawl dam an ni tawh a, hri kai hmuh atanga zaa 98.46 te chu enkawl dam ni tawhin tunah hian hri kai enkawllai 58 an la awm mek a, hri kai zingah nunna chan mi 9 an awm tawh bawk.