Feb. 18, 2021-ah AMC inthlanna neih a ni dawn

Aizawl Municipal Corporation (AMC) inthlanna chu Feb. 16, 2021 khian neih a ni dawn a, he inthlanna a Vote tla te hi Feb. 18-ah chhiar a ni bawk ang.

AMC inthlanna neih tur chungchangah nimin khan State Election Commissioner, Laima Chozah chuan thuthar thehdarhtute kawmin inthlanna neih hun tur hi a puang a, he hunah hian State Election Commissioner chuan AMC inthlanna hi Ward 19-ah neih a ni dawn tih sawiin, heng zinga Ward 6 chu Hmeichhia te tan hauh a ni dawn a, heng hmeichhia te tana Ward hauh hi nikum lam khan lo pawhfel a ni tawh a ni.

He inthlanna neih turah hian nikum January ni 1-a kum 18 tling chin te laa Electoral Roll chu hman tur niin kumin a siam thar chu an hmang hman dawnlo a, he Electoral Roll-ah hian Vote nei thei mipa 1,01,675 leh hmeichhia 1,17,195, an vaiin 2,18,870 an awm dawn a, heng mite tan hian Vote thlakna hmun Polling Station 274 siam niin hri leng avangin Polling Station pakhat-ah vote nei mi 1000 aia an tam lohna turin Polling Station hi siam belh a ni a, Vote thlakna atan hian EVM hman a ni dawn a ni. He inthlanna neih tur puan a nih rual hian Election Model Code of Conducts chu puan nghal a ni bawk.

Ruahman lawk ang chuan nimin-a inthlan neih hun tur puan a nih rual hian inthlan chuh tumte tana hming pekluh theihna hun hawn nghal niin inthlanna chuh tumte tan hian tun thla ni 28 tlai dar 3:00 thleng hming pekluh theih a ni anga, heng hming pekluh te hi January 29-ah enfiahin inthlan chuh tumte tan hian February 1, 2021 tlai dar 3:00 thlengin inhnuhdawhna hun hawn leh a ni anga, February 14 thleng Campaign theihna hun hawngin February 16, 2021 zing dar 7:00 atanga tlai dar 4:00 thlengin mipui ten Vote an thlak anga, inthlanna a Vote tla te hi February 18, 2021-ah a ruala chhiar a ni dawn a ni. Engemaw avanga Vote thlak that ngai a awm chuan Feb. 17-ah Vote thlak that tur a ni ang.

AMC inthlan hnuhnung ber-a thlantlin te term hi nikum December 9 khan a lo tawp tawh a, amaherawh chu hri leng avanga inthlanna neih theih a nih loh avangin AMC enkawltu hna thawk tur, Administrator atan sawrkar chuan AMC-a Commissioner nilai, K. Laldingliana chu ruat in thla hnih a ral leh hmain inthlanna neih tur hi puan a ni ta a ni.