Latest News

COVID-19 hri leng avanga hna chan te tan Training hrang hrang buatsaihna tur hawn a ni

Mizoram Youth Commission (MYC) hmalaknaa Livelihood Generation for Returned Migrant Workers due to COVID-19 Phase-II chu nimin khan LESDE Minister, Lalchhandama Ralte chuan hawngin he hmalakna hnuaiah hian Migrant Workers mi 780 te tan Skill Training chi li (4) buatsaih a ni ang.

Aijal Club-a Livelihood Generation for Returned Migrant Workers due to COVID-19 Phase-II hawnna hunah hian LESDE Minister, Lalchhandama Ralte chuan hri avanga khawvel pum a talbuai mek laiin MYC chu Mizoram thalaite tan a ding reng a, an tangkaizia kan hmu chho zel a ni, a ti a. MYC hmalakna zingah hna zawng mekte tana ‘Hna Inpui Job Portal’ an siam te, All India Service a Mizo thalaite an tlin ve theihna tura Delhi-a Coaching Institute thaa Mizo thalai thiam rual tir tura hma an lakna te a fak a. COVID-19 hrileng avanga ram hrang hranga Mizoram mi leh sa hna thawk mek te an hna chhunzawm thei lova lo haw te tuamhlawm tura MYC hmalakna, Livelihood Generation for Returned Migrant Workers due to COVID-19 thawh hnihna hawn a ni leh ta chu lawmawm a tih thu a sawi bawk.

He hunah hian MYC Chairman, Dr. Vanlaltanpuia MLA pawhin COVID-19 avanga mahni hnathawhna hmun tlansana an hnathawh thin bansan ta thalaite thlavang hauh turin MYC in tan a la tih a sawi a. Hna chan ta te tana eizawnna kawng dap turin NEC-ah Project an thehlut a, chuta tang chuan Livelihood Generation for Returned Migrant Workers due to COVID-19 hi a lo piang ta a ni, a ti.

He project thawhhnihna atan hian MYC chuan NEC atangin cheng nuai 270 hmuin Migrant Workers mi 780 te tan Skill Training chi li - Cement Mistiri, Piggery, Food Processing leh Cake Baking te buatsaih a ni anga. Mizoram chhunga District tin Deputy Commissioner te kaltlanga Training hi kalpui tur a ni.

Livelihood Generation for Returned Migrant Workers due to COVID-19 Phase-II ah hian Cement Mistiri training hi District 11-ah neiin, Piggery Farming hi District 6-ah buatsaih a ni anga, Bakery Training hi District 5-ah leh Food Processing Training hi District 6-ah kalpui tur a ni a. Training zawh hnuah hian training chhuak te tan Post Training Support siamsakin an hman-raw mamawh te an sem dawn bawk a ni.

Comments

Chhiar Hlawhte