Latest News

Krismas leh kumthar vuakvet-a halpuah leh halmawi khapna bawhzui dan thlirlet a ni

Nimin khan Home Minister, Lalchamliana hovin Krismas leh Kumthar vuakvet-a Sawrkar in halpuah, halmawi leh Sky Lantern te khapna thupek a tihchhuah bawhzui dan thlirletna neih a ni.

He thutkhawm SAD Conference Hall-a neih hian Krismas laiin mipuiin halpuah leh halmawi an hal lo chu lawmawm tiin mipui hnenah lawmthu an sawi a; chutih rualin kumhlui thlah zan-a Veng thenkhatin an hal miahloh laia Veng thenkhata hal an awm chu pawi an ti a. Krismas leh Kumthar vuakvet-ah pawh sum leh pai khawhralna mai leh hriselna atana thalo halpuah leh halmawi hal lo turin mipuite an ngen nghal a ni. Tumahin halpuah leh halmawi an hal tawh loh nan kumtir atangin Sawrkar leh Central YMA tangkawpin a theih ang angin hma la se an ti bawk.

Home Minister chuan halpuah hallohna Veng leh a hal te mipui hriata an hming hmerha tarlang Veng thenkhat te hnenah lawmman pek nise tiin a rawt a, hemi atana hman tura ama Discretionary Fund atangin Rs. 25,000 a thawh nghal thu a sawi a. Hun lo awm leh zel turah halpuah leh halmawi khapna thupek te bawhzui turin Aizawl SP Office hnuaiah Cell din nise tih te, hetiang chungchanga zirtirna pe turin MKHC leh Synod Social Front-ah te ngenna siam nise tih te, YMA Branch tinah inhrilhhriatna lam hawi awareness tun aia awmze nei zawka neih thin ni se tih te leh hemi kawnga Veng thawk tha thlanchhuahna neih thin nise tih te an rel bawk.

Kum 2020 Krismas leh 2021 Kumthar vuakvetah khan Aizawl-a Police Station hrang hrangah halpuah hal leh man thubuai (case) 22 ziahluh niin heng zinga 17 te chu halpuah hal thubuai niin a dang 5 te chu halpuah mansak thubuai te an ni a, halpuah leh halmawi cheng nuai khat hu Police ten an man bawk a ni. Heng-a inhnamhnawih mi 28 te chu thubuai siamsak an ni a, chargesheet pawh thehluh a ni tawh bawk. Nikum hmasaa hetiang thubuai 9 ziahluhah mi 6 te chu hrem an lo ni tawh bawk a. Fire & Emergency Services chhinchhiah danin halpuah leh halmawi avanga Krismas leh Kumthar vuakvet-a kangmei chhuak sawitham a awm lo niin meeting-ah hian tarlan a ni bawk. Police lam pawhin kumdang aiin boruak a ralmuan thu leh buaina liamtham engmah Mizoram khawi hmunah mah a chhuah loh thu meeting-ah hian an sawi lang bawk a ni.

Comments

Chhiar Hlawhte