Latest News

COVID-19 hri danna pek dan tur sawihona nei

Serchhip District-a COVID-19 hri danna pek dan tur chungchang ngaihtuahin nimin khan Serchhip-ah District Bawrhsap hovin sawrkar mi pawimawh te an thukhawm.

He thutkhawm Serchhip DC Meeting Hall-a neih ah hian Bawrhsap chuan kan hnung karah khan he hri danna pek anih dan tur enchhinna, Vaccination Dry Run neih a nih tawh thu sawiin, he hri danna hi tunkar Inrinni khian pek tan tura ruahmanna kalpui mek a nih thu a sawi a,  he ruahmanna tha taka hlen tur hian theihtawp chhuah turin he huna tel te chu a chah bawk a ni.

Nimin a thutkhawm ah hian Serchhip CMO, Dr. Laldawngliana Sailo chuan inbuatsaihna te leh ruahmanna kalpui anih dante sawiin, hri danna hi a hmasa berah chuan Health Workers, Frontline worker te leh Police te pek anni anga, an ni dawtah hian natna benvawn neite leh kum 50 chin chunglamte pek an ni ang.

Hri danna pekna tur hmun hi ngaihtuah mek niin, Vaccine vawnthatna turte, a phurhchhuahna tur leh venhimna chungchang te pawh ngaihtuah anih thu he hunah hian tarlan a ni a, hemi atan hian District-a thawktute chu theihtawpa inbuatsaih turin Bawrhsap chuan a ngen a, hri danna pek thawh hnihna tur chungchang pawh thlirho nghal a ni bawk.

Serchhip District-ah hian sawrkar laipui in ruahmanna a siam angin Health Care Workers mi 851 te chu a thawhkhatna-a hri danna pek turin an hming thehluh fel a ni tawh a, heng zingah hian Health Department hnuaia thawk damdawi In enkawltute, Police Department-a thawk te leh Frontline Workers dang te bakah Anganwadi Workers leh  ASHA te an tel a ni.

Comments

Chhiar Hlawhte