Chief Secretary hovin National Voters’ Day hmang

National Voters’ Day chu nimin khan Aizawl-ah pawh Joint Chief Electoral Officer buatsaihin hman a ni a, he hun hi Chief Secretary Lalnunmawia Chuaungo chuan a hmanpui a ni.

National Voters’ Day puala inkhawm ah hian Chief Secretary chuan America anga ram ropuiah pawh mipui rorelna sawrkar a pian hnuin ram mi leh sa ngei tam tak te chuan vote theihna dikna chanvo an nei lova, India-ah chuan Republic kan nih rualin mi zawng zawngin vote theihna dikna chanvo inang khatin kan nei vek a, hei hi kan ram democracy ropuina a ni, a ti a. Vote nei thar thalai ten vote hlutna, pawimawhna leh vote thlakna nachang an hriat theih nan te leh vote thlak chu khua leh tui ten kan tih ngei ngei tur kan mawhphurna lian tak a ni tiin, hetiang lamah kan thanharh nan National Voters’ Day hi hman thin anih thu a sawi a. Kumin-a vote nei thar te chu AMC inthlanna lo awm turah an vote hlu tak chu thlak ngei tura chahin, an duh duh vote theihna zalenna an nei a, hei hi democracy bulthum pawimawh tak a ni, a ti bawk.