Bye-election neih tur ngaihtuahin thutkhawm kan la neilo - MNF Vice President

MNF Vice President, Lalthlengliana chuan Serchhip bial-a bye-election neih tur chungchang ngaihtuahin thutkhawm an la neihloh thu a sawi a. Chief Minister Zoramthanga kaihhruai sawrkar chu mipuiin an ringtawk nia sawiin, MLA atangin in itsikna avanga ban theihna a awmloh thu a sawi bawk.

Nimin-a Serchhip Press Club-a thuthar thehdarhtute a kawmna ah MNF Vice President, Lalthlengliana chuan Serchhip bial-a bye-election neih tur chungchang ngaihtuaha thutkhawm an la neih loh thu hi thuthar thehdarhtute zawhna chhangin a sawi a, Serchhip bial-a Assembly bye-election chu bial ruak a puan a nih atanga thla ruk (6) chhunga neih tur a nih thu a sawi a. Tunah hian AMC inthlanna neih a nih dawn thu leh chumi hnuah chuan Assembly Session ala awm leh dawn thu sawiin, he inthlanna neih turah hian MNF Party chu an hmanhmawh loh thu leh hemi chungchang ngaihtuaha thutkhawm an la neihloh thu a sawi a. He inthlanna neih tura MNF Ticket-a ding tura mipui rinkai zingah amah pawh sawi tel a nih ve thin chungchang zawhna pawh chhangin, kum 2018-a General Election neih dawn khan bial thenkhat chuan an bial-a ding tura an sawm ve thu leh amaherawh chu a nupui damlohna avanga a din takloh thu a sawi a, hemi hnu-a a nupui a boral takah phei chuan hetiang lam ngaihtuahna a neihloh thu leh MLA nih chakna pawh a neih lemloh thu a sawi a. Kum 2023 MLA inthlanpui a an Party sawrkar tir leh chu a tum ber a nih thu a sawi bawk.

MNF Vice President chuan Serchhip bial-ah a rawn kal avanga he bial bye-election a din tum a nih loh thu sawiin, “Hnam Run enkawltu ka ni a, a bul rawn tantu ka ni,” tiin AMC inthlanna neih turah pawh a bultantu a nih thu a sawi a. Serchhip bial-a ding tura mi tam takin an rin, Michael Chhakchhuak chungchanga zawhna chhangin, “Hnam Run-in Michael Chhakchhuak hriatna a nei lo,” a ti a. Serchhip bial-a ding turin MNF Party chuan mi tha tam tak a neih thu leh mipui ten an hnathawh an hriat avanga MNF candidate chu thlantlin a nih a rin thu a sawi bawk.

MNF Vice President, Lalthlengliana chuan kum 2018-a MLA inthlanpui-a MNF in sawr-kar an siam hnuah Chief Minister, Zoramthanga kaihhruai sawrkar chuan nasa taka hma a lak thu a sawi a, kawngpui chhe lutuk thin chu ngai pawimawhin pawisa awm ang anga kawngpui siam nghal a nih thu leh he an hmalakna avang hian MP Inthlan-ah pawh an Party Candidate chu hneh taka thlantlin a nih thu a sawi a. Hemi hnu hian ramri buai chungchang ah te, Tuikuk chung-chang ah te, hri leng chungchang ah te hma an lakna sawiin, “Kan Chief Minister zahawm tak leh Zoram mipuiin malsawm tlaka hma an lak avangin Pathian in kan hmalakna te mal min sawm a ni,” a ti a. CM Relief Fund khawih turin Committee hran hlak siam a nih thu leh langtlang taka kalpui a nih thu a sawi a. MNF sawrkar thil tih that hrang hrang avangin Chief Minister, Zoramthanga kaih-hruai sawrkar chu mipuiin an ring tawk niin a sawi.

Serchhip Bialtu MLA atanga ban tak Lalduhoma chungchang pawh sawiin, mi tam takin an khawngaih thu leh amah ngei pawhin a khawngaih thu a sawi a, “Dan in a phalloh ti lui te hi Dan anga hrem an nih hian miten an khawngaih thin,” a ti a. “He (ZPM) Party-ah hian membership Fee a pek leh pekloh lam a ni lova, a chet dan hi ZPM party ngialngan dik tak a nih avangin Supreme Court thutlukna awm tawhsa angin paihthlak a ni mai zawk a. Hei hi in itsikna leh inngaihlohna avang te, inhuphurhna avang te hian MLA atang in ban theihna dan a awm ngailo a ni,” a ti bawk.

Nimin a thuthar thehdarhtute a kawmna hunah hian MNF Vice President hi MNF General Hqrs. a General Secretary leh Secretary te bakah Serchhip East Block MNF hruaitu ten an tawiawm a. Nimin tlai khan Serchhip-a an Party hruaitute nen inkawmna an nei nghal bawk a ni.