Latest News

Chanchin thar thenkhat :

Assam Rifles te chhuak dawn

Chief Minister, Zoramthanga chuan nimin khan Aizawl Ramhlun South YMA Hall-a AMC Ward No. IV MNF Campaign hawnna leh Manifesto tlangzarhna hun hmanpuiin Aizawl khaw-puia Assam Rilfles te chu an chhuak thuai dawn tih sawiin, COVID-19 vangin an insawn tur a khaihlak thu leh February thla hian chhuak fel vek tura nawr an nih thu a sawi a. “Keini sawrkar lam pawh kan inbuatsaih mek a, Aizawl mai ni lo, Mizoram hmun danga kan ram min chhuhtu sipaite pawh umchhuah vek kan tum a. Hei hi Prime Minister leh Union Home Minister pawh ka sawipui tawh,” a ti bawk.


Awareness Campaign nei

Nimin khan Mamit District chhunga Nal-zawl khua-ah Aspirational District Programme hnuaia Public Meeting and Awareness Campaign on Maternal and Child Health chu District Bawrhsap, Dr. Lalrozama hovin neih a ni a, he hunah hian Mamit DC chuan hriselna lama an District chhunga khaw 11 hnufual bikte zingah Nalzawl khua chu a tel ve avanga tlawh an nih thu sawiin, Anganwadi, Ante Natal Care, ASHA leh VC ten nasa lehzuala tan an lak a ngaih thu a sawi bawk. Mamit District Bawrhsap hian Nalzawl khua-a Sub Centre, Anganwadi Centre leh Zirna In te a tlawh bawk.


ODF+ ah Siaha puan a ni

Siaha khawpui chhunga Village Council zawng zawng te, Self Help Group zawng zawng te, Zirna In zawng zawng leh Siaha mipuite hnen atangin Open Defecation Free+ Self Declaration dawn anih tawh angin nimin, January 28, 2021 khan Siaha khawpui chu Open Defecation Free+ (Final Notification) ah puan a ni a. Hei hian khawpui chhunga chengte chu Ek In (Sanitary Toilet)-ah chauh an inthiar thinin tumah pawn/khawlai (Open)-ah inthiar an awm tawh lo tih a entir a. Community Toilet (Vantlang Ek In) pawh duh hun hun a mipui hman theih turin a awm bawk tih a entir bawk a ni.


PC in Candidate nei dawnlo

Peoples' Conference (PC) Party chuan Aizawl Municipal Corporation (AMC) inthlanpui neih turah Candidate an nei dawnlo tih an sawi.  Nimin-a thuchhuah an siamah PC Party chuan AMC inthlanpui lo awm turah Ward tin-a Candidate neih tuma hmalakna thui tak an neih hnuah nikum Dec. 5-a Election Commission of India-a Party hming thlak an dilna chu nimin, January 28, 2021 thlenga chhanna an la hmuh loh avangin AMC Inthlanna chu chuh ve rihloh an ti tlu tih an sawi a. AMC Ward tina PC Party mi leh sâ te sukthlekna lam tur chu thla thar ni 1 khian Office Bearers Meeting-in a ngaihtuah tur thu leh hei hi lo ngaichang tura an in ngen thu an tarlang bawk.


MPYCC in Governor-ah thlen

Congress Thalai, Mizoram Pradesh Youth Congress Committee (MPYCC) chuan Minister, Lalruatkima Facebook account nia hriat atanga India ram Danpui (Constitution of India) kaihlek (edited) post chungchanga Cyber Crime-a FIR an thehluh chu chak zawka umzui turin nimin khan Mizoram Governor, PS. Sreedharan Pillai-a hnenah ngenna an thlen a, MPYCC Vice President, F. Lalhmangaiha chuan hetiang khawpa India ram Danpui zahlohna leh diriamna a thlen hnuah pawh hnuchhui hna a muang hle chu pawi an ti tih sawiin, rang zawka finfiah a, a mawhphurtu hrem ngei chu an phut tlat thu a sawi bawk.

Comments

Chhiar Hlawhte