Latest News

AMC inthlan lo awm tur leh By-election lo awm turah hian kan chak ngei ka ring - Lalduhoma

ZPM Leader, Lalduhoma chuan AMC inthlan lo awm tur leh Serchhip Bial-a By-election lo awm tura an chak ngei a rin thu a sawi.

Tuikum Bial chhunga khaw pahnih, Darlawng leh Phulmawi khuaa nimin a ZPM Party in mithar lawmluhna hun an buatsaih ah he thu hi sawiin ZPM Leader, Lalduhoma chuan Mizoram Political History thlir chuan by-election ah opposition an la tling ngai mang lo tih a sawi a. “Kum 1982-ah Phuldungsei bial-ah Remna Tichhetute Banna (RTB) hmangin MLA ni lai chu Lungphun khuaa thah a nih avangin Opposition Candidate, Pu Liansuama thlantlin a lo ni tawh a. Tun tum by-election tur hi chu a dan a dang a, MLA atanga min bân chhan leh by-election neih ngaia a awmna chhan hi mipui ten an theihnghilh ka ring lo. AMC inthlan lo awm tur leh By-election lo awm turah hian kan chak ngei ka ring tlat a ni,” a ti.

Politics a khelh tawh chinah Congress President atanga a ban chhan chu a chhuan ber te zing ami a ni tih pawh sawiin Lalduhoma chuan, “MNF unaute zalenna sual avangin kan khua min halsak a, kan hmeichhia te an pawngsual a, khatih lai khan MNF lo haw duh tawh, haw thei si lo kha koh haw a, remna siampui ka duh avangin Congress President ka nihna ka bansan a, MP ka nih a pawh min paih dawn tih hre sa ka ni,” a ti a. “Khatih hunlai khan sum leh pai engmah ka nei lo, chaw nghei mai pawh ka hmabak tih hre reng mah ila zalenna pawh sual tawh lo MNF sipai rammu hreawm taka an awm kha ka lainat em avangin Central Minister hial min tiam mah se, MNF leh Zoram mipui tan ka MP nihna chu ka hlan ta a ni. Kan unauten remna leh muanna hnuaia an lo chhuah theihna tura ka beihna kha ka nuna ka chhuan ber te zinga mi a ni,” a ti bawk.

Comments

Popular News (Last 30 Days)