Thenzawl-ah hri kai mi 5 hmuh belh leh an ni

Pathianni-a Thenzawl-a COVID-19 hri kai mi pahnih ten an lo kawm hnaih te chhuina kal zelah COVID-19 hri kai mi 5 hmuhchhuah belh an ni a, an vai hian chhungkaw pakhat a mi vek an ni.

Niminpiah khan Serchhip District-a TrueNat Laboratory-ah Sample 51 enfiah niin Rapid Antigen Test hmangin Sample 10 enfiah a ni bawk a, TrueNat Laboratory-a Sample enfiah atang hian COVID-19 hri kai mi 5 hmuh belh niin heng mite hi Pathianni-a Thenzawl-a COVID-19 hri kai hmuhchhuah tawh ten an chenpui te Sample enfiah atanga hri kai hmuhchhuah an ni a, mipa pathum leh hmeichhia pahnih niin puitling kum 57 mi pakhat bakah naupang kum 5, 8 leh 13 mi bakah nausen thla 9 mi te an ni a, an vai hian taksa-a natna hri kai lanchhuahna neilo vek niin hri an kai tih hmuhchhuah an nih hnu hian Nursing School CCC-a enkawl tura rawn lakchhoh an ni.

Heti hian nimin thleng khan Serchhip District-ah COVID-19 hri kai hmuhchhuah chu 167 an tling ta a, an zinga mi 151 te chu enkawl dam ni tawhin nimin khan hri kai enkawl dam an awm belh lova, tunah hian hri kai enkawllai mi 16 an la awm mek a ni.