Serchhip District-ah hri kai 3 hmuh belh leh

Inrinni khan Serchhip District-ah COVID-19 hri kai mi pathum hmuhchhuah leh niin Serchhip District-a hri kai hmuhchhuah chu 174 an tling ta.

Serchhip CMO Office atanga thu kan dawn danin tunhnaia Thenzawl-a COVID-19 hri kai hmuhchhuah chhuizuina atanga tun thla ni 8-a nausen thla 9 mi hri kai hmuhchhuah CCC-a awm mek enkawltu a Nu chu taksa lama insawiselna a neih avangin Rapid Antigen Test hmanga enfiah niin hri a kai tih hmuhchhuah a ni a, amah hi kum 33 mi a ni. Heti hian Pathianni kaltaa Thenzawl-a COVID-19 hri kai mi pahnih hmuhchhuah an nih hnuah hri kai mi 8 hmuh belh an ni tawh a, Thenzawl atanga hri kai hmuhchhuah hi mi 10 an tling ta a ni.

Inrinni khan Serchhip Dawngzawl-a BSF mi leh sa pahnih te chu ZMC Laboratory-ah an Sample enfiah atangin COVID-19 hri an kai tih hmuhchhuah a ni bawk a, heng mite hi State pawn atanga rawn lut niin an Sample hi remchan zawkna avangin ZMC-a enfiah tura thawn a ni.

Zirtawpni  khan Serchhip District-a COVID-19 hri kai mi pathum te chu enkawl dam an nih hnuah anmahni enkawlna hmun atanga chhuahtir leh an ni a, heng hri kai enkawl dam te hi Nov. 22-a hri kai hmuhchhuah leh tun thla ni 1-a hri kai hmuhchhuah an ni a, nimin khan mi 2 te chhuahtir leh niin heng mite hi PTS-a awm, Nov. 25-a hri kai hmuhchhuah te an ni bawk. Serchhip District-a COVID-19 hri kai hmuhchhuah chu 174 an ni ta a, heng zinga 158 te chu enkawl dam ni tawhin tunah hian hri kai enkawllai 16 an awm mek a, an zinga 15 te chu CCC-ah enkawl niin mi pakhat hi Home Isolation-a enkawl a ni thung.