ATM hman theih dimdawi turin mipuite an ngen

Serchhip District Consumers Association (SDCA) chuan Serchhip khawpui chhunga ATM harsatna thleng mek chungchangah hma an lak thu sawiin, mipuite chu ATM hman theih awm te fimkhur tak leh dimdawi taka hmang turin an chah.

Serchhip District Consumers Association te hian thuchhuah siamin Serchhip khawchhunga pawisa lakchhuahna khawl (ATM)-a harsatna thleng chungchangah theih ang tawkin hma an lo la ve tawh thin tih an sawi a, tunlai hian Serchhip khawpui chhunga kan ATM neih ho te hi a function thalo hle tih sawiin, State Bank General Manager pawh be pawpin thil awmdan te zawhfiah a nih thu leh Serchhip AOC-a State Bank of India ten ATM an enkawl lai chu a current line lam a felloh avangin khar rih a nih avangin siamtha turin an ngen a. New Serchhip-a ATM chu a enkawltu Company lam atangin harsatna awmin, thawktu lam indaihlohna avangin ATM hi khar niin kumin chhung chu hawn theih a nih hmel tawhloh thu an sawi.

Hei bakah hian Tuikhuah Veng-a UBI ATM chu UBI hi Bank dang nen an inzawm dawn avangin signal khar rih a nih thu leh he har-satna hian kar 2 vel a la awh an rin thu thawktu ten an sawi thu an sawi. Hetiang hi thil awmdan anih avangin tun dinhmunah Serchhip khawpui chhunga ATM 4 awm zingah Serchhip Bazar-a Apex Bank ATM chiah mipui tana hman theih a nih thu tarlangin, hei vang hian zan dar 6:00-a khar thin chu mipui mamawhna a nasat avangin hawng rei deuh turin thuneitute chu an ngen a, an ngenna ang hian Bank Manager chuan zan dar 8:00 thleng hawn a nih tawh tur thu alo hrilh a ni. SDCA chuan Serchhip in ATM hman theih kan neih tlem rih avangin kan neih chhun Apex Bank ATM hi dimdawi taka hmang turin mipuite an chah a, pawisa lakchhuah theih aia tam lakchhuah tum lo tur leh account a pawisa awmlo chunga lakchhuah tum luilo turin an ngen bawk a ni.