PC Party in Mamit DFO hnenah ngenna thehlut

Peoples' Conference (PC) Party chuan Nov. 21, 2020-a Phaizau khaw bul Tut lui-a Bomb hmanga Sangha mantute man an la nih loh avangin, nimin khan Mamit DFO hnenah hma la tura ngenna lehkha an thehlut.

Hemi chungchanga PC Party in thuchhuah siama an tarlan danin Bomb hmanga Sangha man avangin mi tam tak man lo ni tawhin hrem hial an ni tawh tih an tarlang a. Nov. 21, 2020-a Tut lui-a Bomb hmanga Sangha man hi a finfiahna tur thlalak pawh tam tak awmin Media-ah thehdarh a nih thu leh chu mai bakah Sangha mantute hian pawisa hial chawiin, fin-fiahna chiang tak a awm chungin tun thlengin Sangha beitute hi man an la ni lo niin an tarlang.

He Sangha manna ah hian Mamit Constituency bialtu MLA, Er. H Lalzirliana a tel nia sawi a nih thu tarlangin PC Party chuan, mipuiin thudik an hriat nan chhuichian a ngaih zual thu leh dikna rorelna lekkawh ngei a tulzual tih an sawi bawk. PC Party chuan Bomb hmanga Sangha man hi Explosive Act, 1884 te; Mizoram Forest Act, 1955 te; Wildlife (Protection) Act, 1972 te; Biological Diversity Act, 2002 te leh Mizo-ram Fisheries Act, 2002 te kalh nia sawiin, kum 7 thleng lung In-a tan mai baka cheng nuai 2 thleng chawi tira hrem theih a ni tih an sawi bawk.