LADC-ah MNF kaihhruai sawrkar thar lakluh a ni

Lai Autonomous District Council (LA-DC)-a MNF kaihhruai sawrkar thar chu nimin khan lakluh niin Protem Chairman, Member leh Chief Executive Member thar te lakluh an ni.

Lai Autonomous District Council (LADC) 11-na din tura inthlanna neih zawh a a nih hnuah nimin khan sawrkar thar lakluhna hi Lawngtlai-a LADC Secretariat Tual-ah neih a ni a, LADC sawrkar thar-a Protem Chairman leh MDC-te lakluhna inkhawm hi LADC-a Secretary, Lianchung-nunga kaihhruaia neih hmasak niin Protem Chairman atana Lallawmsanga Apetow ruatna sawrkar notification chu chhiar chhuakin Lawng-tlai District Bawrhsap, Dr. Andrew H. Vanlaldika chuan Protem Chairman hi lalutin hemi hnu hian Protem Chairman chuan LADC MDC bial 25-a MDC thlan tharte chu an Bial indawtin a la lut zui nghal a ni.

Hemi hnu hian LADC-a Chief Executive Member (CEM) lakluhna inkhawm neih zui nghal niin he hun hi LADC-a Executive Secretary, H. Lalramenga chuan a kaihruai a, LADC Chief Executive Member atana Manghmunga Chinzah ruatna sawrkar notification chu chhiar chhuakin hemi hnu hian Lawngtlai District Bawrhsap chuan 11th LADC-a MNF Legislature Party Leader, Manghmunga Chinzah chu CEM atan a lalut zui a ni. Nimin a he hun hmanna ah hian Lawngtlai East bialtu MLA leh Agriculture Development Board Vice Chairman, H. Biakzaua leh CEM thar, Manghmunga Chinzah ten thu an sawi bawk.