Faina ah tan lak zui zel a tul

Faina ah tan lak zui zel a tul

Mizoram sawrkar in ruahmanna a siam angin Mizoram khawpui fai thlanna neih mek niin kar kalta khan Serchhip khawpui pawh rawn enfiah a ni tawh a, kan khawpui chhung hmun hrang hrangte a fai thain khawtlang in faina kawngah hma pawh kan la nasa hle a. Serchhip hi Mizoram khawpui fai thlanna neih hnuhnung berah khan District Hqrs. te zingah khawpui fai ber atana thlanchhuah a ni tawh a, hei vang hian kumin ah pawh kan khawpui a fai mek hi thil thar a ni lova, chutih rual chuan mitinte hian faina hi kan nunpui zel a, mahni awmna hmun theuh ah kan fai zel hi a pawimawh hle a ni.

Faina leh thianghlimna hi hriselna nen thil inzawm tlat a nih avangin faina lamah hma kan lo sawn zel theihna turin sawrkar chuan nasa takin hma a la tawh thin a, Faina Hapta pawh kum engemaw zat kal tawh atang khan hmangin hma pawh kan sawn hle mai a. Hei mai bakah hian khawpui fai thlanna te neih chhunzawm zel niin mipuite kan lo changkang tawh nen, faina lamah pawh hma kan sawn nasa hle mai a, amaherawh chu faina kawnga kan hmalakna erawh tawpsan mai theih a ni lova, tun aia kan fai lehzual theih nan hma kan lak zel hi a pawimawh a ni.

Serchhip khua hi Mizoram laili-a awm, ziak leh chhiar thiam tamna leh hnamdang in an chenpawlh lemloh kan ni a, hei vang hian kan bawh tawh lamah chuan Mizoram pum-a langphak thei kan ni deuh zel a ni. Hei vang hian faina lama hma kan lakna ah pawh hian theihtawp kan chhuah zel a nih chuan Mizo-ram mipuite tana entawntlak kan ni thei tih hre rengin faina hi kan nitin-ah nei ila, ‘Khaw fai’ tia hriat reng kan nih theihna turin tan kan lak chhunzawm zel a tul a ni.