Latest News

CCC-a awm tan thilpek hlan

Baptist Church of Mizoram (BCM) Khawng-lung, Bungtlang te chuan Serchhip District-a COVID-19 hri kai enkawlna hmuna awm mek te tanpuina atan nimin khan Serchhip District Bawrhsap hnenah cheng sing hnih an hlan.

BCM Khawnglung, Bungtlang te hian CCC-a awm mek te tanpuina hi nimin khan District Bawrhsap, Kumar Abhishek hnenah hlanin he hunah hian bialtu Pastor, Rev. F. Zorinkhuma chuan an bial chhunga awm BCM Rawpui te chuan Lunglei lamah thilpek an lo hlan tawh thu sawiin, BCM Bungtlang te pawhin Serchhip-ah an lo hlan tawh bawk tih a sawi a. BCM Khawnglung ten Serchhip CCC tan an rawn hlan ve leh tih sawiin, CCC-a awm damlote mamawh a tul apianga hman atan Bawrhsap hi an pe tih a sawi a ni.

Thilpek hlan tur hian bialtu Pastor bakah BCM Khawnglung Chairman, Upa Biak-chhawna leh Secretary, Upa CC. Lalsanga te an rawn kal a, District Bawrhsap Kumar Abhishek chuan BCM Khawnglung te chungah lawmthu sawiin, COVID-19 avangin sawrkarin sum leh pai tam tak a seng reng a, engchen nge la insen zui ngai dawn tih pawh chhut thiam a ni lova. Hetiang dinhmuna kan din laia bengvar tak maia BCM Khawnglung ten pawisa thahnem tak an rawn pe chu a hlu hle tih a sawi bawk.

BCM Khawnglung-ah hian chhungkaw 65 awmin Member 335 an awm mek a, thilpek hi an Kohhran Relief Fund tlingkhawm atanga an pek a nih thu Upa CC. Lalsanga chuan a sawi.

Comments

Chhiar Hlawhte