Serchhip District-a COVID-19 hri kai hmuh mi 87 te enkawl dam vek an ni ta

Kumin June 8-a Serchhip District-a COVID-19 hri kai hmuhchhuah a nih atanga hri kai hmuhchhuah tawh zawng zawng mi 87 te chu enkawl dam vek an ni ta.

Mizoram in COVID-19 hri leng a buaipui tirh, kumin March thla atang khan Serchhip District-ah hian hri kai hmuhchhuah a nih theihna turin chak taka hmalak ve nghal a ni a, kumin June 8 khan Serchhip District-a hri kai hmuhchhuah hmasak ber awmin hemi hnu hian a khat tawkin hri kai hmuhchhuah hi an awm deuh reng a, October ni 28 thleng khan hri kai hmuhchhuah hi awmin hemi hun chhung hian hri kai mi 87 hmuhchhuah hman an ni a, hri kai hmuhchhuah zinga enkawl dam hnuhnung ber chu Inrinni khan Thenzawl AYUSH Hospital CCC atanga chhuahtir niin heti hian Serchhip District-a hri kai hmuhchhuah zawng zawngte chu enkawl dam vek niin hri kai hmuhchhuah zaa za ten damna an chang a ni. Serchhip District-a hri kai enkawl dam hnuhnung ber ni mek hi hri kai hmuhchhuah hnuhnung ber ni bawkin Oct. 28, 2020 khan hri a kai tih hmuhchhuah a ni a, amah hi kum 18-a upa, Assam atanga rawn kal niin Prem Kram Company hnuaia thawk a ni a, Oct. ni 21 khan Serchhip rawn thlengin inkhunghranna hmuna dah a nih hnuah hri a kai tih hmuhchhuah niin Inrinni khan enkawl dam a ni ve leh a ni.

Serchhip District-ah hian Inrinni thleng khan COVID-19 hri leng avangin mi 3444 te chu an Sample enfiah sak an ni tawh a, heng Sample enfiah sak te hi ZMC RT-PCR Laboratory-ah mi 947, Serchhip-a TrueNat Laboratory-ah mi 963 leh Rapid Antigen Test hmangin mi 1534 te an ni bawk.

Serchhip District-a COVID-19 hri kai hmuhchhuah te enkawl dam vek an nih lai hian tun dinhmun ah Serchhip District-a COVID-19 hri kai enkawllai mi pahnih an la awm mek thung a, heng hri kai enkawllai te hi BSF Sipai te niin Nursing School CCC-a enkawllai an ni a, District dang-a hri kai hmuhchhuah leh Serchhip-a enkawl tura rawn dah te an ni.

Serchhip District-ah hian District pawn atangin BSF Sipai hri kai enkawl tur rawn dah mi 189 te chu enkawl dam an lo ni tawh a, hei bakah hian District dang atanga hri kai enkawl tur rawn dah mi 58 te chu Thenzawl-a AYUSH Hospital CCC-ah enkawl dam ni tawh bawkin tun thlenga Serchhip District-a hri kai enkawl dam tawh zawng zawng chu mi 334 an ni ta a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn