COVID-19 hri leng dona leh ramri buaina thlenga I&PR Department hmalakna thlirho a ni

Information & Public Relations Department chuan nimin khan I&PR Minister, Lalruatkima hovin a Pisa-ah hripui darh zel venna kawnga I&PR Department hmalakna an thlirho a. Ramri-a buaina thleng kaihhnawih ah sawrkar thu-chhuak ngaichang zel turin I&PR Minister chuan mipuite chu a chah bawk.

He thlirhona hunah hian I&PR Minister, Lalruatkima chuan hripui darh dan te a danglam chho nia a lan thu sawiin, mipui inhrilhhriat leh inzirtir kawngah pawh boruak in her chho zel mila kalpui tha a tih thu a sawi a, Publicity leh Awareness chu tha thlah lova mar pat-a kan kalpui a tul zel dawn tih a sawi bawk. He hunah hian hripui leng chungchanga an Department hmalakna hrang hrang te chu tun dinhmun thlirin a tha thawkhat ah an ngai a, amaherawh chu boruak a inthlak danglam reng avangin hemi mila Awareness kalpui dan pawh thlak dang lam emaw tih belh emaw a tul chho dawn tih tarlan a ni bawk.

Assam nena ramri a buaina kan neih mekah Zoram mipui te inlungrualna tha kan neih zel a pawimawh thu pawh I&PR Minister chuan sawiin, he boruak-ah hian Zoram mipui te tanrualna te, State danga cheng Zohnahthlak te thlamuanna aw-ka te, Sawrkar hmalakna mipuiin an tawiawm thatna te chu a lawmawm hle tih sawiin, heng ah te hian Sawrkar thuchhuak ngaichang zel turin mipuite a chah a. Mipui te ei leh bar lakluh kawngah chi-ai mai lo a Sawrkarin hma a lak mekna te tichak zawnga tan la zel turin mipuite a sawm a. Sawrkarin ei bar leh nitin mamawh te la lut turin Tripura leh Manipur lamah te hma a la chho mek tih sawiin, kawng leh Lei thuamthat ngai te pawh a theih ang angin chak taka thawmthat mek a nih thu a sawi bawk.

I&PR Minister chuan Assam nena ramri chungchanga buaina kan neih mekah I&PR Minister a nihna angin mipui te thu thehdarh kawngah fimkhur tlang tur leh thu chianglo leh rintlak lo midang te ti chi-ai thei Social Media lamah vawrhdarh lo turin mipui te chu ngenin a sawm a. Manipur atanga Oil leh Gas phur tura Oil Tanker 5 leh eirawngbawlna Gas phur Truck 3 thang mekte chu Vawiin-ah Aizawl an lo thlen beisei a nih thu pawh a sawilang a. Silchar leh a chhehvela awm Mizote chu an him vek thu sawiin, boruak duhawm lo engmah a thleng lova, a tul ang angin buaipui mek niin an haw dan tur te pawh Sawrkar in a ruahman mek niin a sawi bawk.

Rural Development Department changtu Minister ni bawk Lalruatkima chuan hripui leng mek avangin mitin te nitin mamawh lakkhawm leh inhlawhfa chawp te tan harsatna a awm lo thei lo tih pawh he hunah hian a sawi a, chumi tih ziaawm nan thingtlanga awmte tan MGNREGS hnuaia inhlawhna November leh December-ah ni 7 ve ve siam belh a nih tur thu pawh a sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn