Sawrkar kum kal mekah Serchhip-ah Chhiah cheng vbc. 2 chuang hmuh a ni tawh

Serchhip-a Taxation Department chuan sawrkar kum kal mekah Chhiah chi hrang hrang cheng vbc. 2 chuang an hmu tawh a, sawrkar kum kal mekah hian Mizoram pumah Taxation Department Chhiah hmuh tura beisei hi chu hmuh ngei an inbeisei thu Taxation Department hotute chuan an sawi bawk.

Deputy Commissioner of State Tax, Serchhip Zone Office atanga thu kan dawn danin kumin April thlaa sawrkar kum a thar hnuah Serchhip District-ah Chhiah khawn hna hi ngawrh taka kalpui zel a ni a, Hri leng karah pawh Chhiah khawn hna hi ngawrh taka thawk zelin, October thla tawp, thla 7 a liam thleng khan Chhiah chi hrang hrang Rs. 2,19,87,195/- zet an hmu tawh a ni. Chhiah hmuh zingah hian State GST atanga hmuh tam berin Rs. 1,31,05,629/- hmuh a ni a, Profession Tax-ah Rs. 27,30,752/- hmuh niin State Sales Tax (VAT)-ah Rs. 61,50,814/- hmuh niin Chhiah hmuh dang erawh a awmlo thung a ni. Ocotober thla bikah khan State GST atang sum hmuh hi nasa taka pungin Rs. 78,88,234 zet hmuh a ni a, Profession Tax-ah Rs. 8,97,160/- hmuh niin State Sales Tax (VAT)-ah Rs. 38,79,331/- hmuh a ni bawk.

Taxation Department hotute sawi danin hrileng karah Taxation Department hian Chhiah khawn hna ngawrh taka thawk chhunzawm zelin sawrkar kum kal mek, April 2020-ah Inkharkhip kalpui a nih hnuah phei chuan Online System hmangin Chhiah khawn hna hi ngawrh taka thawh chhunzawm zel a ni a, kumin April thla khan  Mizoram pum-a Chhiah lut zawng zawng hi cheng vbc. 14.35 chauh a nih laiin October, 2020-ah chuan Mizoram sawrkar sum bawmah Rs. 72,37,37,401/- an chhunglut phak tawh a, heng te hi GST atangin Rs. 66,88,31,821/- bakah Profession Tax-ah Rs. 2,27,06,534/- leh VAT-ah Rs. 3,21,99,046/- zet a ni. Heti hian Financial Year kalmek, 2020-21 chhunga Taxation Department in Chhiah an khawn tawh zawng zawng chu Rs. 3,23,17,88,467/- a tling tawh a ni.

Mizoram sawrkar chuan kumin 2020-2021 atan Taxation Department sum hmuh tur target a siam chu Rs. 6,000,000,000/- a ni a, target hi hmuh theih an beisei leh beisei loh chungchang zawhna chhangin Taxation Department thawktute chuan engemaw harsatna a thleng a nih loh chuan target chu an hmuh theih mai an beisei tih an sawi a. “GST bikah chuan ngai kan awh chho leh tan mek niin kan hria a. Dan pangngaia bungrua hi a lo luh reng theih a, har-satna dang a awm loh chuan kan target hi kan tlin leh mai theih kan beisei a ni,” an ti.

Taxation Department hian kum 2019-2020 chhunga sawrkar-in target tura an siam chu Rs. 5,21,79,06,000/- anih laiin a vaiin Chhiah Rs. 6,67,28,72,503/- an hmu a, an target hi Rs. 1,45,49,66,503/- in an khum a. Goods & Services Tax bikah sawrkarin target a siam chu cheng vbc. 355 niin Rs. 5,31,98,06,155/- an hmu a, target an khumna hi Rs. 1,76,98,06,155/- a ni. Professional Tax-ah target cheng vbc.16.7 anih laiin Rs. 17,47,69,967/- hmuin an target hi Rs. 77,69,967/- in an khum a. Taxes & duties on Commodities and Serives-ah Rs. 1,13,374/- an hmu a, Registration & License Fee-ah Rs. 5,99,790/- hmuin target Rs. 2,93,790/- in an khum a ni.

Hetihlai hian Tax on Sales, Trade etc. (VAT tia hriat thin) ah erawh an target an phak lo thung a, sawrkarin target tura a tuk sak Rs. 1,50,06,00,000/- a nih laiin Rs. 1,17,75,83,217/- hmuin Rs. 32,30,16,783 in an phak lo a. VAT a target an phak loh chhan hi sawrkarin zu zawrh a tih tawp vanga sum hmuh a tlem tak vang nia ngaih a ni.

Hei bakah hian thenawm ramdang te atanga Dan lova Sikret leh eitur dang rawn lut ah Dan anga Chhiah lak a nih thin loh avangin Chhiah hmuh a tlem phah thin thu an sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn