Chanchin thar thenkhat :

National Award dawng

Ministry of Jal Shakti in a buatsaih ‘2nd National Water Award’ ah Mizoram chu Best State (Special Category) ah thlan a ni. National Water Award semna hi nimin khan Vigyan Bha-wan, New Delhi-ah neih niin India Vice President, M.Venkaiah Naidu chuan khuallian niin a hman-pui a ni. National Water Award 2019 atan hian Mizoram a sawrkar Department hrang hrang ten dilna an thehlut a. Irrigation & Water Resources Department chuan Best State leh Best Water User Association (Dakla, Sihphir leh Phaizau, Champhai) Category-ah te dilna an thehlut a. Ministry of Jal Shakti atang Technical Team March ni 9 - 11, 2020 khan Mizoram-ah lo kalin, Department hotute leh Water User Association te kawmna te neiin, an hmalakna leh hnathawh te a hmunah an tlawh a ni.

NEP sawihona neih a ni

Nimin khan Mizoram-a Group of Experts on National Education Policy, 2020 a vawi khatna atan Human Resources Development Board Vice Chairman, L. Thangmawia hovin an thukhawm a, he hunah hian Mizoram-a National Education Policy, 2020 lo hman ve theih dan turte leh ram tana himlo lai a awm em tih te an sawiho a. Mizoram sawrkarin zirna kalpui a tum dante leh policy neih mekte nen a inmil em tihte en hoin ram tana tha ber tura zirna kalpui a nih theih nana NEP 2020 herrem dan turte an sawiho bawk.

MZP ten hrethiam lo

Mizo Zirlai Pawl (MZP) General Hqrs. chuan Mizo mipuite harsatna tawh ah a rang thei ang bera hma la turin Mizoram Governor chu an phut thu an sawi. Nimin a thuchhuah an siamah MZP General Hqrs. chuan Lailapur vaiho in ni 13 chhung zet Mizoram ei bar lakluhna kawngpui an dan pin tawh hnu pawha kan State Constitutional Head ber, kan Governor in Mizote thlavang hauh tur leh kan harsatna sukiang tura tawngkam leh hmalakna a neih thawm hriat tur awm lo chu hriat-thiam har an tih thu leh an dem thu an tarlang.

Hawla’n PM hnenah a thlen

MPCC President, Lal Thanhawla chuan nimin khan India ram Prime Minister hnenah lehkha thawnin, Cachar District, Assam-a Mizoram panna kawng-pui NH-306 dan pin mek chungchangah a rang thei ang bera hma la turin a ngen. MPCC President chuan a lehkha thawn ah hian India ram hmun dang atanga Mizoram chak lakna kawngpui ber Cachar District, Assam-a NH-306 chu mi awm tha duhlo thenkhatten ni 10 chuang an dang tawh tih a sawi a. He an kawng dan avang hian Mizoram economy-in nasa takin a tuar tawh a, kawng hi dan pin reng a nih chuan Mizoram mipuite chu dinhmun chhe lehzual hmachhawn thei reng an ni tih sawiin, hkawng danpin hian COVID-19 hripui leng avanga mipui tawrhna a ti zual hle niin a tarlang.

Kuhvarah lei tur dang

    Nimin-a Kuhvarah lo tura Saihapui V-a kal Vai sumdawng te chu Saihapui V-a MZP ten dangin Lailapur-a lirthei dan mek te chhuah an nih hma chu sumdawnna kalpui an rem tih loh thu an hrilh. Saihapui V-ah hian nimin khan Vai sumdawng te hian an Kuhvarah lei tawh sa te lo turin an kal a, MZP te hian an hriat velah dang nghalin, Lailapur-ah Mizoram lut tur lirthei te dan mek a nih laiin helai ah sumdawnna eng chi mah kalpui an rem tih loh thu an hrilh a. Lailapur lama lirthei te chhuah an nih hma loh chuan sumdawnna buaipui tura Saihapui V-a kal tawh lo turin an hriattir nghal a ni. Saihapui V-a kuhva rah tam zawk hi Vai ho in an lei sa a ni hlawm a ni.

Mizoram Health Minister tel

Nimin khan Union Health Minister Dr. Harsh Vardhan-a kaihhruaina hnuaiah India ram State 7 - Mizoram, Maharashtra, Manipur, Tripura, Meghalaya, Uttrakhand leh Goa Health Minister-ten  Video Conference an nei a, he hunah hian Health Minister, Dr. R. Lalthangliana pawh telin COVID-19 dona a hmalakna a tarlan bakah Mizoram mamawh te a thlen bawk.