Ramri-a Motor lut tur dan a nih avangin Serchhip District-ah tuialhthei leh Gas a harsa tan

Tunhnaiah Silchar atanga Mizoram Oil phurhluh theih ni rihloh hnuah Serchhip District-a Petrol Pump te chuan Petrol hralhchhuah tur an nei mumal tawhlo a, Diesel phei chu lei tur a awm tawh lova. Eirawngbawlna Gas pawh tun thla ah rawn thleng ala awmlo bawk.

Tunhnaiah Mizoram leh Assam ramri-a buaina thleng avangin Assam State atangin Tuialhthei leh Gas rawn thleng awm mumal rihloh avangin mipui ten harsatna an tawk chho tan dawn mek niin a lang a, thudawn danin Serchhip District-ah hian Petrol Pump pathum awm mekin heng te hi Serchhip-ah pakhat leh Thenzawl-ah pahnih te an ni a, Serchhip-a Petrol Pump awmchhun, PB. Lalzuithanga Filling Station-ah nimin-a report a luh thlengin Petrol (MS) litre 2820 awmin XP (Xtra Premium) litre 4300 a awm a, nimin atang khan lirthei hrang hrangah Petrol te hi semrual niin Two Wheeler-ah Rs. 200/- man, Auto Rickshaw-ah Rs. 300/- man leh Car-ah Rs. 500/- man-a semrual a ni.

PB. Lalzuithanga Filling Station neitute chuan Diesel hi chhekkhawl tlem la awm mah se mipui tan lei theih a nih tawhloh thu leh an pekchhuah tawhloh thu sawiin, Buhfai phur tur Motor te tan sawrkar in a dah a nih tawh thu an sawi a. Tunah hian an Tanker pakhat chu load la sa in State pawn lamah a awm mek thu leh a rawn let theihloh thu sawiin, an Motor pakhat erawh chu Load la tura a kal Vairengte paltlang theilo-a a awm mek thu an sawi bawk.

Hetihlai hian Thenzawl-a Mizofed Petrol Pump-ah chuan Petrol leh Diesel awm tawh lovin R. Lallura Filling Station-ah chuan nimin thleng khan Petrol (MS) litre 1000 la awmin Diesel leh XP erawh a awm tawhlo a, mipui hnenah hralh-chhuah tur tuialhthei a awm tawhlo bawk a ni.

Serchhip District-a Gas Agent lian ber, Mizofed Serchhip Branch-a thawktute pawhin Oct. 26, 2020 hnu lamah eirawngbawlna Gas hi an dawng tawhlo tih sawiin, tunah hian mipui hnena sem tur an neih tawhloh thu leh an Office lama dil te pawh pek tur an neih tawhloh thu an sawi a. Ramri-a Mizoram Motor lut tur dan mek a nih avang hian Serchhip-a dah tur eirawngbawlna Gas phurtu Truck pali (4) te chu an tangkhang mek tih an sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn