Serchhip District-ah Sample 3412 enfiah tawh

Nimin thleng khan Serchhip District-ah COVID-19 hri leng avangin Sample 3412 enfiah a ni tawh a, hri kai mi 87 hmuhchhuah an ni tawh bawk.

Serchhip CMO Office atanga thu kan dawn danin Mizoram-a COVID-19 hri leng buaipui a nih atang khan Serchhip District-ah hian a tul angin Sample enfiah hna hi thawh ve nghal a ni a, a tir lamah Serchhip District-ah Sample enfiah theih a nih loh avangin Sample an lakkhawm ang ang te chu ZMC-a RT-PCR Laboratory-ah enfiah tura thawn niin Sample 947 te chu thawn hman a ni a. Hemi hnu hian Serchhip District-ah TrueNat Laboratory dinin Sample enfiah hna hi thawh chhunzawm niin tun thlengin TrueNat Laboratory-ah hian Sample 943 enfiah a ni tawh bawk a, hei bakah hian Repid Antigen Test hmangin Sample 1522 enfiah ni tawhin Serchhip District-a Sample enfiah zawng zawng hi 3412 a tling tawh a ni.

Serchhip District atanga Sample enfiah atang hian hri kai mi 87 hmuhchhuah ni tawhin heng zinga mi 86 te chu enkawl dam an ni tawh a, tunah hian hri kai enkawllai mi pakhat la awmin hri kai hmuhchhuah hnuhnung ber chu October 28, 2020-a hmuhchhuah kha a ni a, amah hi State pawn atanga rawn lut niin ani pawh hi tunkar hian a Sample hi enfiah nawn leh hman tura beisei a ni bawk. Serchhip District-ah hian hri leng avanga mahni In lama inkhunghrang mi 19 leh sawrkar hmunhmaa inkhunghrang mi 20 an la awm mek a ni.