Ramri-a harsatna thleng chungchang sawihoin Mizoram-a lut tur lirthei dan mek titawp tura tih a ni

Tunhnaia Mizoram leh Assam ramri-a buaina thleng kaihhnawih chungchangah nimin khan Union Home Secretary hovin State pahnih Chief Secretary te chuan Video Conference hmangin inbiakna an nei a, Assam-in Mizoram-a lirthei lut tur an dan chu titawp turin thutlukna siam a ni.

He inbiakna neih zawh a nih hnu nimin tlai khan Chief Secretary, Lalnunmawia Chuaungo chuan Aizawl-a Secretariat Conference Hall-ah thuthar thehdarhtute kawmin an inbiakna chungchang hi a sawi a, Chief Secretary chuan Assam-in October 28, 2020 atangin kawngpui an dan tan thu sawiin, “Mipuiin harsatna an tawk tih kan hria. Chutihlai chuan ramri buai vang a ni tih hriaa Mizo mipuite kan tanho leh thawhho that avangin tun hun hi kan thleng a ni. Mipui leh pawl hrang hrangte dawhtheihna leh thahnemngaihna a lawmawm takzet,” a ti a. Tuna IR Police-te awmna hmun chu Assam lam chuan an ramah an ngaih thu sawiin Chief Secretary chuan, “Keini lam chuan kan ram chhung ngei a nih thu kan sawi thung. Police kan dahte withdraw phutna atan kawng dan a ni. MHA pawhin theihtawp a chhuah reng a, thil awl ai a ni lo, chhete tal offer nei ve turin min ngen a ni. Kan dinhmun thlirin Police kan hnuhkir thei loh thuin kan chhang thin,” a ti.

Union Home Secretary hova inbiaknaah Assam lamin duhdan leh demand tam tak an neih thu sawiin Chief Secretary chuan, “Tihhlawhtlin vek chi a ni lo. Mizoram-in ramri-ah BSF dah se, Assam-in vawiin-ah (nimin) kawng hawng rawh se tiin thutlukna siam a ni. Vawiin (nimin) ah kawng hawn hman a nih loh pawhin naktuk (Vawiin-ah) chuan hawn hman a nih ngei ka beisei,” a ti a. Ramri-a buaina in ziaawm lam a pan zel a beiseiawm tih pawh sawiin, “Buaina chhuak tur zawnga hma la lo turin mitin kan ngen a ni. Tharum thawha chinfel chi a ni lo. Assam lam chuan ramri-a kan Police-te withdraw vek leh anmahni lam pawh withdraw vek an duh a, tunah chuan kan la thei ve lo. Boruak a zirin sawiho zel ang,” a ti a, Police-te withdraw nise Assam lamin kawng an dan lohna a rei tawh tur thu a sawi bawk.

Tunhnaia ramri-a BSF Sipai dah chung-changah Chief Secretary chuan Central sawrkar in duh leh dil vang reng ni lovin BSF Sipai Company thum te hi tul tih anga hman tura a rawn dah thu a sawi a, Ramri buai zual laiah dah an tum thu pawh sawiin, Vairengte-ah Company 1 leh Platoon 1, Saihaipui V-ah Platoon 2 leh Thinghlun-ah Platoon 1 dah tum a nih thu a sawi a, “Ramri-ah hian facilities tha pawh nei lovin Police tam tak kan dah a ni,” a ti a, “Ramri-ah hian sipai kan lo indah tam hman viau mai a, hetia BSF te dah belh an han nih dawn takah chuan riahna leh inthiarna fahran pawhin a dawl zo dawn lo hrim hrim a, kan Police te hi engemawzat kan la chhuak then phawt anga, Thinghlun, Vairengte leh Saihapui V-a kan mipuite thlamuanpui tham erawh chu an la awm vek dawn a ni,” a ti bawk.

Chief Secretary sawi danin Vairengte-ah chuan BSF-te hi tuna IR Police-te awm mekna thlangah dah tum an ni a, Saihapui V-ah chuan tuna IR awm mekna leh Assam Police ho awmna chhehvelah dah an ni dawn a. Ramri-a Mizoram Police awm mekte chu Assam lamin phut mah se hnuhkir vek an ni dawn lo tih a sawi a ni.

Chief Secretary, Lalnunmawia Chuaungo chuan mi fing leh thil hrehawm tak tak a ngaih, sawrkar-a tawnhriat neite pawhin Assam lama lirthei tangkhangte 'Police hmanga hruai chhuah mai awm' tia rawtna te an neih thu sawiin, “A zia lo tak tak a ni. Chutianga tih chi a ni lo. Mipuite a ni lo zawnga infuihpawrh tumna a te a ang thei,” a ti bawk.

Hetihlai hian nimin lam khan ramri hnaih a BSF Sipai te awmna hmun tur siam hna hi thawh nghal a nih thu kan thudawnna chuan a sawi bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn