Chanchin thar thenkhat :

CM hovin sawihona nei

Nimin khan Chief Minister, Zoramthanga hovin CM Office Conference Hall-ah Mizoram leh Assam-a sawrkar laipuiin Central Armed Police Force a rawn dah chungchang sawiho a ni a, Mizoram-a awm tur BSF Sipai te hi Vai-rengte-a Mizoram Police awmna thlanga awm-hmun khuar sak tura ruahman a ni a. Vairengte, Saihapui V leh Thinghlun duty post te chu siam-rem tum a ni. Hei bakah hian ramri kan tur lirthei tangkhang engemawzat awmte chu an tlang thuai theih nana hmalakna kal mek te pawh he hunah hian sawiho a ni bawk.


Oil phurtute lo dawngsawng

Mizoram sawrkar tirh a Manipur-a Oil phur tura tirh motor 5-te chuan Zirtawp tlai khan Aizawl an rawn thleng a, sawrkar mi pawimawh thenkhat ten Thuampui-a AMC Office tual-ah an lo hmuak a ni. He hunah hian an pualin hun tawite hman a ni a, Driver leh Handymen 12 te hi chawi-mawina thuziak leh Thangchhuah Diar hlan an ni a, he hun kaihruaitu Supply Department-a Joint Director, Laltanpuia Hnamte chuan sawrkar hmalakna tihhlawhtlin kawnga theihtawp chhuahtu te zawng zawng chungah lawmthu a sawi a ni. Heng Oil phur motor 5 te hi MIZOFED, Lalbiakliana FS leh Lalnghakliana FS motor te an ni a. Hetihlai hian Oil phur tur Tanker 5 te chuan Manipur an thleng leh tawh a ni.


Thlai man to sawihona nei

Tunhnaia Aizawl leh a chhehvel-a thlai thar man to ta lutuk chungchang chu Inrinni khan Commerce & Industries Director J. Hmingthan-mawia hovin mi pawimawh ten an sawiho a, thlai thar kharchhawngtute pawhin Oil a van tak avanga motor hman man a san tawh thu te sawiin, Serchhip District-a thlai tharchhuahte mumal zawka a hralh dan tur lo enfel pui turin DHO, Serchhip ruat a ni a, Sihphir chhehvela tharchhuah te a hralhna tur lo enfel pui turin DHO, Aizawl leh Commerce & Industries hotute leh MCU hruaitute ruat an ni bawk.


I&PR Minister in tlawh

I&PR Minister, Lalruatkima chuan Inrinni zing khan Aizawl Vaivakawn-Hunthar-Chanmari West a lei tawlh avanga khawtlang-in harsatna an tawh dan a hmunah a en a, he hunah hian I&PR Minister chuan lei che avang hian building engemaw zat thiah a nih tawh thu leh chhungkua 30 chuang zetin an chenna In an chhuahsan tih sawiin, helai hmun hi uluk taka zirchiang turin leh Thal chhunga tui luanna mumal zawk leh kawng siamthat dan tur chu District Disaster Management Authority, SIP-MIU, PWD leh khawtlang hruaitute nen sawiho leh nise an ti a ni.


CM leh HM bang tlak-ah ngai

PC Party Vice President, Vanlalruata chuan, “Kan Chief Minister leh Home Minister te hi bang tlak an ni,” a ti. Inrinni khan Mizoram leh Assam ramri bawra Assam miten buaina an rawn siam leh hemi nghawng kal zel chungchangah thuchhuah a siamah PC Party Vice President chuan tuna Assam awp chhung ram zau tak, Innerline Reserved Forest chhung khu kan ram a ni tih sawiin, Assam atanga buaina an siam thin hi hmalakna hun remchang a nih laiin kan sawrkar chuan hma a la lo tih a sawi a, hetiang sawrkar hi kan mamawh lo tih a sawi bawk.


Phainuam-a School building-ah bomb puak

Inrinni zing dar 2:00 rik hma hret khan Mizoram leh Assam inrina bul Phainuam Buarchep-a School-ah bomb tihpuah leh a ni. Hemi chungchanga Home Department thuchhuah tarlan danin Inrinni zing dar 2:00 hma deuh khan Assam leh Mizoram inrina hrula Phainuam-ah mimal ram-a Bengali Medium School Building-ah mi tu tih hriatloh ten bomb an tipuak a, School Building a chhe nual tih hriat a ni. Hemi chungchang hi rang takin Sawrkar chuan a bawhzui nghal a, a hmunah Mizoram Police te leh Mizoram Forensic Team te tirh nghal an ni a. He thil thleng avang hian DIG (Northern Range), Lalbiakthanga Khiangte pawh a hote nen a hmun an pan nghal a, Vairengte Police Station-ah thubuai ziahluh a ni bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn