Heroin leh Grape Wine man

Serchhip-a Excise & Narcotics Department chuan nizan hmasa khan Serchhip-a lakluh tur Heroin gram leh Grape Wine Litre 775 zet manin heng kaihhnawih ah hian mi 7 man an ni bawk.

Serchhip-a Excise & Narcotics Department hian an thudawn bawhzuiin nizan hmasa dar 7:00 vel khan Serchhip leh Champhai inkar-a tlan Maxi Cab pakhat atangin Heroin No. 4 gram 9 an man a, he Motor hi Tuichang-ah lo changin Driver thutna hnuaia dah heng damdawi te hi an man a, lirthei khalhtu hian a phurh hi enge tih a hriatloh thu a sawi avangin a neitu chhui zui nghal a ni. Excise & Narcotics Department hian nizan hmasa vek khan Bungtlang lam mi nia insawi te hnen atangin Dawngzawl-ah Heroin gram 3 an man bawk a, a neitu nia hriat mi pahnih man nghal niin heng Heroin an man te hi tualchhung a hralhna angin Rs. 60,000/- man vel nia chhut a ni.

Nizan hmasa-a Excise Department in Heroin manna Maxi Cab leh Champhai-a service Maxi Cab dang pakhat atangin Excise Department hian Champhai atanga rawn lak Grape Wine litre 775 zet an man bawk a, heng Grape Wine te hi bur 25-a dah niin pakhat hi Rs. 2850/- a lain Rs. 3200/- velin zawrhchhawn leh thin nia hriat a ni a, hemi ang hian Rs. 80,000/- hu niin a neitu nia hriat mi pathum te pawh man nghal an ni bawk. Heng an thil man kaihhnawih a Excise in an man mi 7 leh an thil man te hi nimin tlai khan Serchhip District Court-ah hruai nghal an ni.

Assam Rifles in Heroin man

India leh Myanmar inrina a duty, Serchhip-a hmunpui nei Assam Rifles te leh Excise Department te chuan tunlai hian India leh Myanmar inrina bul, Champhai District-a Tlangsam-ah ruihhlo man beihpui hi thlak mekin, nimin zing dar 5:00 vel khan rinhleh mi pakhat hmuin Sipaite hian an um nghal a, an mi um hian heng ruihhlo, nylon a in tuam hi thlauhin heng damdawi hi an man a, an damdawi man hi gram 198.3 man niin cheng nuai 30 man vel nia chhut a ni.