Chanchin thar thenkhat :

COVID-19 vangin boral

Mizoram-a COVID-19 hri kai zingah nimin khan nunna chan mi pakhat a awm leh. Sawrkar thuchhuah in a tarlan danin nimin zing dar 1:30 vel khan COVID-19 vangin Darhawni (78), Durtlang Leitan chu ZMC-ah a thi a, Darhawni hi Oct. 21 khan Rapid Antigen Test hmangin COVID-19 a kai tih hriatchhuah niin ZMC Isolation Ward-ah enkawl a ni a, a dinhmun a that loh zui avangin October 23-ah ICU-ah dahluh niin nimin zing khan a boral zui ta a ni. Darhawni ruang hi nimin zing dar 8:00 khan Durtlang Leitan Local Council House-ah vui a ni. Tun tum hi Mizoram in COVID-19 hri kai avanga nunna chan mi pahnih a neihna a ni ta a, hemi hmalam October 28, 2020 khan Aizawl Dawrpui Veng-a Lalsangkhuma chu a lo boral tawh bawk a ni.


Nimin thleng khan Mizoram-ah COVID-19 hri kai hmuhchhuah chu mi 2958 an tling ta a, an zing ami 2473 te chu enkawl dam ni tawhin tunah hian hri kai enkawllai mi 483 an awm mek a, nunna chan mi pahnih an awm tawh bawk. Nimin khan Mizoram hmun hrang hrangah hri kai enkawl dam mi 38 an awm a, Mizoram-a hri kai hmuhchhuah atangin zaa 83.60 te chu enkawl dam an ni tawh a ni.


Hremna pek dan tur ngaihtuah

Mi panga a thah avanga thiamloh chantir tawh, Laltlanchhuaha hremna tur chu tun thla ni 9 khian puanchhuah tura ruahman a ni. January ni 9, 2015-a Aizawl Republic Veng-a chhungkaw pakhat-a mi 5 te thattu, Laltlanchhuaha chu Court in puh a nihna hrang hrangah thiamloh a chantir hnuin nimin khan Addl. District & Sessions Court chuan hremna pek dan tur a ngaihtuah a, he hunah hian sawrkar Ukil leh mitthi chhungte chuan Laltlanchhuaha chu thi tura hremna pe turin Court hi an phut laiin Laltlanchhuaha Ukil erawh chu thi tura hrem lovin damchhung tang tura a chungthu rel sak turin Court hi an ngen thung a ni. Court thutlukna hi tun thla ni 9 khian puan tura ruahman a ni.


Central YMA in an dem

Nimin khan Central YMA CEC thutkhawm neih niin Assam Sawrkar-in Mizoram pawhtu nitin mamawh kan lakluhna kawngpui a dang ping tlat mai chu Dan zahlohna leh palzutna lian tak a ni tih sawiin, an dem takzet tih an sawi a. Mizoram mamawh lakluhna kawngpui a rang thei ang bera hawn a nih theih nana hma la tura sawrkar an phut thu sawiin, ramri vengtu Mizo Police te pawh hnukkir lo tura an duh thu an sawi a. Silchar Mizoram House-a tangkhang mekte him dam taka lak-chhuah an nih theih nan sawrkar in ruahmanna siam se an duh thu pawh sawiin, hmun hrang hranga YMA te chu an huamchhungah chhuanchham an awmlohna tura hma la turin an chah bawk.


HPC Party inthlanna nei

Hmar People's Convention (HPC) Party President inthlanna chu nimin khan Sinlung Hills Council (SHC) huamchhungah tluang taka neiin HPC Party President thar atan Rohringa S/o Chhunga (L), Khatla, Aizawl chu hneh taka thlantlin a ni. He inthlanna ah hian Vote nei mi 302 awmin vote 288 a tla a, vote tla zawng zawngte nung vekin nimin a vote tla chhiar ah Rohringa (76) hian vote 195 a hmu a, amah hnaih bertu LT. Hmar, Bawngkawn, Aizawl chuan vote 77  a hmu a, Lalparkunga, Sakawrdai in vote 16 a hmu ve thung a ni. Tarlan tawh angin HPC Party-ah hian President inchuhna a awm avangin Court ruahman angin inthlanna hi neih a ni.


VC Vote tla chhiar nawn

Kumin August 27-a Kolasib District Pang-balkawn khuaa VC inthlanna neih a Vote tla te chu nimin khan Kolasib DC Conference Hall-ah VC Election Tribunal ruahman angin chhiar nawn leh a ni a, a hmaa tling-a lo puan tawh te chu an tling leh vek a ni. VC Seat 5 awmna Pangbalkawn VC-ah hian INC in Seat 2 lain MNF, ZPM leh Independent in seat khat theuh an la a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn