Assam ramri kaltlangin Mizoram-ah nitin mamawh tluang taka chawkluh zel a ni

Assam atanga Mizoram luhna kawng dan hawn a nih leh hnuah dan pangngai in ramri paltlangin lirthei an tlan leh mek a, tun thlengin ei leh barah Mizoram-in harsatna a tawk lo. Hetihlai hian Mizoram-a tuialhthei dahkhawlna awmchhun, IOC Oil Depot, Vairengte ami chu kum 20 vel zet hman tlak lohin a awm tawh.

Tunhnaia Mizoram leh Assam ramri-a buaina thleng avanga Assam lam miten an State chhunga Mizoram chak lakna kawngpui pawimawh ber, National Highway 306 an dan avangin Vairengte a lo lut tur lirthei engemawzat chu Assam lamah hun engemawchen dan a ni a, inbiakna hrang hrangte neiin lirthei hi chhuah a nih lawk loh hnuah Ningani kalta, November ni 11, 2020 zan dar 6:30 atang khan kawng dan hi tihtawp niin, Mizoram-ah lirthei hrang hrangte luhtir leh niin nizan thleng khan State pahnih ramri-ah hian lirthei ten harsatna tawk lovin bungrua an phur tlang leh thei tawh a ni. Sawrkar thuchhuah tarlan danin, nimin tlai dar 4:00 thleng khan Assam atanga Vairengte Gate patlangin lirthei 2890 a rawn lut tawh a, an zingah hian tuialhthei phur 138, eirawngbawlna gar phur 110 a tel a, hei bakah hian lirthei te 576 a tel bawk.

Hetihlai hian Mizoram-a tuialhthei dahkhawlna awmchhun, Vairengte-a IOC Oil Depot chu kum 20 vel zet hman tlak lohin a awm tawh a, thudawn danin kum 1986 vel khan Indian Oil Corporation (IOC) chuan Vairengte-ah hian tuialhthei dahkhawlna hmun, Oil Depot hi a siam a, helai hmunah hian Petrol, Diesel leh Khawnvartui te chu Litre Nuai 4 vel theuh chhekkhawl theih tura ngaih niin Oil Trip 300 vel chhekkhawl theihna ngaih a ni a. Hun engemawchen chu tangkai taka hmangin, IOC chuan heta tang hian Mizoram hmun hrang hranga dah turin Oil te hi an pechhuak thin a ni.

He Oil Depot hi kum 1997 atang khan a Tanky Leak avangin hman theihloh in a awm chho tan a, siamthat a nih mai loh avangin zawi zawiin IOC chuan a hlamchhiah hret hret a, tun thlengin hman theihlohin a awm ta a, Mizoram Oil phurtu Tanker ten Ramnagar (Silchar) atanga an Oil phurh te Mizoram hmun hrang hranga an dahna tur siamfel a Challan tih fel nan chauh helai hmun hi hman a ni ta a ni. Tunhnaia Mizoram in harsatna a tawh ah pawh khan helai Oil Depot hi hman tlak ni sela chuan harsatna thleng lo tura ngaih a nih thu kan thudawnna chuan a sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn