VC inthlan thlirletna nei

Nimin khan Serchhip District Election Officer leh District Bawrhsap, Kumar Abhishek hovin Serchhip District-a Village Council inthlanpui neih zawh tak thlirletna neih a ni.

Serchhip DC Meeting Hall-a he thutkhawm ah hian District Bawrhsap chuan Village Council inthlanpui tluang tak leh felfai taka neih zawh a ni ta chu lawmawm a tih thu sawiin, hemi atana thawktu MPF, NGO, MJA leh Election Department-a thawk, PRO leh RO zawng zawng te, Police, Power & Electricity, PHE, I&PR, leh Department dang te, MCC Team te, Sector Officers te, Polling Station atana an building hman remtih saktu Kohhran School leh tlawmngai pawl te, Vote thlaka khua leh tui tha nihna hlentu District mipui zawng zawng chungah te lawmthu a sawi a. Thawktu zawng zawngte leh mipuite thu awihna zarah Serchhip District-ah vote 80.61% tlain District vote tlak that berna kan ni tih sawiin, hetianga thawhhona tha leh duhawm hi chhunzawm zel turin a chah a ni.

He hunah hian Addl. DC, Lalmuansanga Ralte pawhin lawmthu sawiin, thawhhona tha tak vangin inthlanna felfai tak kan hmu thei a ni, a ti a. Thawktute inpekna fakin an thawhrimna chu chhuanawm a tih thu a sawi a. A tir atanga atawp thlenga thawhpuitu Serchhip Media mite an fakawm a tih thu leh a sawi bawk.

He hunah hian tlawmngai pawl leh MPF aiawhte pawhin Serchhip District Election Office-a thawktute chu thawhpui nuam, zangkhai leh mahni hnaa inpe tak an nih avanga kawng engkima chet nuam an tih thu an sawi a. A tulna apiangah lawm taka an thawhpui zel tur thu sawiin, VC inthlanna felfai a awm theih nana thawktute zawng zawng chungah lawmthu an sawi a. Hmun thenkhata vote thi a la tam deuh chhan nia hriat te pawh sawiho niin Vote thlak dan inzirtirna uar deuh zawka kalpui a tul nia hriat a nih thu te pawh sawilan niin hmasawnna atana thil tul nia an hriat te pawh sawiho a ni bawk.