Latest News

Mizoram-ah hri kai hmuh tam ber ni a thleng

Darkar 24 kalta chhung khan Mizoram-ah COVID-19 hri kai mi 69 zet hmuhchhuah an ni a, hei hi Mizoram-ah darkar 24 chhunga hri kai hmuhchhuah an tam ber tum a ni.

Darkar 24 kalta chhunga Mizoram-a COVID-19 hri kai hmuhchhuah thar te hi ZMC Laboratory atanga hmuhchhuah vek niin Rapid Antigen Test leh Lunglei Civil Hospital TrueNAT Laboratory-a Sample enfiah atangin hri kai hmuhchhuah erawh an awmlo thung. Niminpiah a hri kai hmuh thar te hi mipa 62 leh hmeichhia 7 niin Aizawl District mi vek an ni a, an zinga mi 13 te chu Aizawl Veng hrang hranga hri kai lo hmuhchhuah tawh te nen inkawmhnaih atanga hri kai te niin Aizawl Venghnuai-ah mi 6, Tuikhuahtlang-ah mi 5 leh Bungkawn Vengthar leh Venghlui-ah mi pakhat ve ve te an ni a, an zingah hian naupang pathum an tel a ni.

Niminpiah a hri kai hmuhchhuah dang zingah hian BSF Sipai 48 telin RAY Falkland-a khunghran lai vek an ni a, Indian Army mi 6 tel bawkin Thuampui Helipad-a khunghran lai an ni a, hei bakah hian Falkawn-a Construction worker 2 te pawh hri an kai tih hmuhchhuah a ni bawk.

Niminpiah kha Mizoram-ah darkar 24 chhunga hri kai hmuhchhuah an tam ber ni niin kumin August 15 khan hri kai 64 hmuh an lo ni tawh bawk a, heti hian Mizoram-ah hri kai hmuhchhuah tawh zawng zawng chu 1192 niin mi 750 te chu enkawl dam an ni tawh a, tunah hian hri kai enkawllai 442 an la awm mek a ni.

India ramah hri kai hmuhchhuah belh zel an ni :

India ramah darkar 24 kalta chhungin COVID-19 hri kai 89,696 hmuh leh niin India rama hri kai hmuhchhuah chu 43,70,118 an tling tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 11,54,549 enfiah leh niin heng atang hian COVID-19 hri kai hi mi 89,696 hmuh leh a ni a, India ramah Sample enfiah zawng zawng 5,18,04,677 tling tawhin hri kai hmuhchhuah zawng zawng chu 43,70,118 an tling tawh bawk a ni. 

Hetihlai hian India ramah hian COVID-19 hri kai enkawl dam chu pung zelin darkar 24 kalta chhung khan mi 74,894 enkawl dam an ni a, tunah hian hri kai enkawl dam zawng zawng chu 33,98,844 niin hri kai hmuhchhuah atanga zaa 77.77 te chu enkawl dam an ni tawh a, hri kai enkawllai 8,97,394 an awm bawk a ni. Darkar 24 kalta chhung khan India rama hri kai zingah nunna chan mi 1,115 awm lehin India a hri kai nunna chan chu 73,890 an tling tawh bawk a, hei hi hri kai hmuhchhuah atangin zaa 1.69 niin India ram State hrang hranga hri kai zinga thi tamna ber, Maharashtra-ah chuan mi 27,407 zet an thi tawh a ni.

Comments

Popular News (Last 30 Days)