Serchhip-ah Health Care leh AB-PMJAY kalpui dan tur zirhona neih a ni

Mizoram sawrkar in Health Care Scheme leh AB-PMJAY a kalpui chhunzawm tur atan nimin khan Health Department Serchhip Main Centre hnuaia Health Workers leh ASHA te tan Health Care Scheme leh AB-PMJAY chungchang zirhona neih a ni.

He zirhona Serchhip Auditorium a neih hi Serchhip Chief Medical Officer, Dr. Laldawngliana Sailo chuan hmanpuiin COVID-19 hri leng mek avangin kumdang angin Health Care Scheme chungchang zirhona chu mi tam tak pungkhawma neih theih a nih loh thu leh mi tlem te te tan Centre hrang hrangah buatsaih a nih thu a sawi a. COVID-19 hri leng mek chungchang pawh sawiin, hri leng dona kawnga an Department hmalakna te a sawi a, Health Department hnuaia thawktute chu hri leng dona ah mipuite tana entawn tlak ni turin a chah bawk.

He hunah hian Aizawl-a Health Care Office atanga rawn kal, Francis Lalrinsiama chuan he huna kalte hi zirtirna pein Mizoram sawrkar in Health Care Scheme a kalpui mek a inziaklut te hi tun thla, September 2020 hian a tawp dawn tak avangin thla thar, October 1, 2020 atangin inziahluh a ngai tawh dawn a. Health Care Scheme hi damloh nikhua a sawrkar-a MR bill theilo te tana duan niin natna chi hrang hrang bakah OPD thenkhat te pawh a huam a. Health Care Scheme hi sawrkar leh Private Damdawi In ah te hman theih niin Damdawi In a awm zawng zawng ten he Scheme hi tangkai taka an hman theih nan inziaklut vek turin mipuite chu an ngen a. He Scheme a inziaklut duh tan sum chawi tur ruahmansa awmin Planning & Program Implementation Department in kum 2016-a BPL List a siam-a tel te tan Rs. 100/- leh chhungkaw dang tan Rs. 1000/- ngaiin sawrkar-a MR Bill theilo chhungkua zawng zawng tan inziahluh theih a ni anga. AB-PMJAY Golden Card neite pawh Health Care-ah hian inziahluh theih niin Private damdawi In tam zawkah AB-PMJAY Golden Card hi hman theih a nih loh avangin Health Care Scheme-a inziahluh a pawimawh thu pawh tarlan a ni bawk.

Sawrkar laipui Scheme AB-PMJAY (Ayushman Bharat Pradhan Mantri Jan Arogya Yojana) hi kum khat-a Rs. 5,00,000/- thleng Bill theihna a ni thung a, AB-PMJAY ah hian SECC Deprived List 2011 ami leh kum 2018-a RSBY Smart CArd nei te chauhin Golden Card hmangin a hamthatna te hi an hmang thei a. AB-PMJAY hnuaiah hian cheng nuai 5 thleng hman theih ni mah se natna a zirin biktuk zat (package rate) aia tam tumkhat ah hman theih a ni lo thung a. AB-PMJAY hi Cashless niin Health Care Scheme erawh senso hmuhletna (Reimbursement) a ni thung a ni.