Chanchin thar thenkhat :

UD&PA in chhawmdawlna hlan

Champhai District-a UD&PA Department chuan nimin khan Champhai khawpui chhunga Home hrang hrang, sawrkar kum kallai a chhawm-dawlna la dawng kimlo te hnenah Shelter for Urban Homeless (SUH) kaltlangin tanpuina a pechhuak a. Sawrkar kum kalmekah hian Home 8 te hnenah an mamawh bungrua chi hrang hrang te pek niin kum upa lamte enkawlna tur hmun, Special Shelter Old Age Home sakna atan Rs. 32,32,000 /- dah anih thu tarlan a ni a. Shelter for Urban Homeless (SUH) kaltlanga Home hrang hrangte thawmthat leh cheithatna Financial year tina pek thin chungchangah sawrkar kum kalmek a cheng nuai khat la pek tlin loh te chu sum hi pek leh tura ruahman a ni.


Vawk man te tihhlum a ni

Champhai District atanga Dan lova Vawk lakluh man 10 te chu Champhai District Court thupek angin nimin khan Champhai AH & Vety Complex-ah kahhluma phum a ni a. Heng Vawk zinga 7 te hi a note niin August 19, 2020-a Tlang-sam dai-a man te an ni a, a dang pathum te hi a puitling tawh niinSept. 17, 2020-a Zaote kai-a man an ni thung. Heng Vawk mante hi AH& Vety Department, Champhai ruahmanna in Porcine Reproductive and Respiratory Syndrome (PRRS), Classical Swine Fever (CSF) leh African Swine Fever (ASF) natna te an vei leh vei loh endik anih hnuah PRRS leh CSF an vei tih hmuh a ni a, hri an tihdarh zel lohna turin kaphluma phum an ni ta a ni.


TrueNat Lab. hmang tan

Khawzawl District Hospital-a TrueNat Laboratory bun thar chu nimin khan Khawzawl District Bawrhsap, Zothanmawia chuan hawngin hman tan a ni ta a, heti hian Mizoram sawrkar in COVID-19 hri leng avanga District Hospital a TrueNat khawl a bun te chu hman theih a ni ta vek a ni. TrueNat Laboratory enkawl tur hian sawrkar chuan Khawzawl District Hospital-ah hian thawktu a dah belh a ni.


MTET atan hun pawhsei a ni

Mizo Students’ Union (MSU) General Hqrs. hruaitute chuan COVID-19 hrileng avanga zirlaite harsatna thleng mek avangin Mizoram Teacher Eligibility Test (MTET)-2020 dilna form fill-up hun chu pawtsei leh tura ngenna nimin khan Mizoram Board of School Education (MBSE) hotute hnenah an thlen a, MBSE hotute chuan Sept. 25 thleng hun pawhsei a nih tur thu lo hrilhin lawmawm an tih thu MSU chuan an sawi bawk.


BJP in thilpek an hlan

BJP Mizoram Pradesh chuan India Prime Minister, Narendra Modi pianchampha lawmna kal zelah nimin khan Hermon Children Home, Durtlang leh Samaritan Riangvai Run, Seling te tlawhin thilpek an hlan a. BJP hian Prime Minister piancham lawmna atan hian Vantlang tana thil tha tihna hun hmangin faina beihpui te thlaka thingtiak te phunin midangte tanpuina hun atan te an hmang a ni.


Lalduhoma’n Tachhip VC thar lawmna a hmanpui

Nimin khan Tachhip-ah ZPM VC thar lawmna neih niin Lalduhoma MLA chuan a hmanpui a ni. Tachhip-a ZPM VC thar lawmna ah hian Lalduhoma chuan Tachhip khawtlang rorelna ah kalphung thar, mipui sawrkar thlentir thei tur VC thar, ZPM in a nei chu a lawmawmin a chhuan-awm tak meuh tih a sawi a. Kan Budget chu a nih dan tur angin hmang ila chuan he ram siam-thatna tham a ni tih sawiin, “ZPM MLA ten MLA fund hmanga hna kan thawh danah mipui fak kan hlawh a, MNF MLA 27 te Fund hman dan ai chuan, ZPM MLA 7 te Fund hman dan hi a lar zawk a ni,” a ti a. “MLA 7 lekin ZPM policy, Kalphung Thar, Mipui Sawrkar zia rang kan lantir ang hian, ZPM VC leh LC te chuan in lantir ve tur a ni,” a ti bawk.


MPCC in MP (RS) an ngen

Mizoram Pradesh Congress Committee (MPCC) chuan September 16,2020-a Mizoram MP (Rajya Sabha), K. Vanlalvena chuan Parliament-ah Ramhmul damdawi (Medicinal Plants) lam zirchianna tur Institution, Mizoram-a din tura Central sawrkar leh a changtu Minister a ngen chu lawmawm an tih thu leh hlawhtling ngei se an duh thu thuchhuah siamin an tarlang a. Kum 2017 December 18 khan khatih laia Chief Minister, Lal Thanhawla chuan Shri Shripad Naik, Minister of State, Ministry of AYUSH hnenah D.O. letter thawnin, Mizoram-a Medicinal Plants zirchianna tur Research Institute din turin a lo ngen tawh nia sawiin, January 23, 2018-ah Director General, Central Council of Research in Ho-moepathy chuan rawn chhangin, Council-in a rang thei ang bera Mizoram-a Regional Research Institute din an duh thu leh ram ruak acre 3 a zau lo ngaihtuah tura ngenna a rawn thawn thu leh Lal Thanhawla pawh hian a chhan leh thu an sawi a. Mizoram a Research Institute dinna tura hmalakna hi a hlawhtlin ngei theih nana theihtawp chhuah zui zel turin Mizoram MP chu an ngen a ni.


Lirthei lut tur dan tintuah

Mizoram-a lirthei neitu leh khalhtu pawl hrang hrangte chuan an thilphut te tun thla ni 29 hmaa tih hlawhtlin a nih loh chuan Mizoram-a lirthei rawn lut te dan nise an ti. Zoram Drivers Union (ZDU) General Hqrs. thuchhuah chuan niminpiah-a Zoram lirthei pawl hrang hrangte thukhawm chuan tun thla ni 12 zan-a Lailapur, Cachar District a an Driver pui ten kut an tuar chu pawi an tih thu leh zangnadawmna pe ngei tur leh motor chhia siam ngaite senso pe ngei tura an ngen thu an sawi a. Pawikhawihtute hi a rang thei ang bera man chhuak turin Mizoram sawrkar an beisei tih sawiin, tun thla ni 29 hmain a hlawhtlinna an hmuhloh chuan Mizoram-a lirthei lo lutte dan nise, a hlawhtlin ngei theih nan hmalak nise an ti a ni.

Comments

Chhiar Hlawhte